Oblystyń Baıǵanın aýdanynda qarasora ósirip, odan esirtki zattaryn daıyndap, ótkizbekshi bolǵandar quryqtaldy. Munyń ózi qanshama aldyn alý sharalary júrgizilgenimen, esirtki zattary men nasha óndirýdiń óndiristik jolǵa qoıyla bastaǵanyn kórsetse kerek. Sonaý Qyzylorda oblysynan kelip, Baıǵanın aýdany aýmaǵyndaǵy Qarajar aýylyna jaqyn mańdaǵy ózen jaǵasyna jaıǵasyp alyp, 2 gektar jerge tórt tanap qarasora egip, jasyryn esirtki daıyndaýdy kásip etken eki azamattyń aram oıy júzege aspady. Olar qarasora egisi mańynan qamystan kúrke turǵyzyp, qarasora egilgen alqapty eki sý sorǵymen sýaryp, 3 myń jasyl butany baptap kelgen. Endi az ǵana ýaqyt ótkende, ıaǵnı, tamyz aıynda osy qarasora egindiginen 350 keliden astam esirtki zattaryn daıyndamaqshy eken. Abyroı bolǵanda qarasoranyń aınalymǵa túsý joly kesildi. Qarasora egýshilerden eki myltyq tárkilendi. Kúdiktiler azyq-túlikten qor jasap, sonymen birge, ań-qus aýlap, azyqtanyp kelgen.
Bul azamattar buryn da túrmeniń dámin tatqandar kórinedi. Ázirge tergeý jumystary júrgizilýde. Qylmyskerlerdiń adamnyń úsh uıyqtasa túsine kirmeıtin áreketterge barýy qaýiptendiredi. Shý boıynda ósetin jabaıy qarasoramen kúresip júrgende irgeden – aq qarasora ósirgenderdiń shyǵa bastaýy bul baǵytta batyl qadamdarǵa barýdy qajet etetini sózsiz.
Satybaldy SÁÝIRBAI,
«Egemen Qazaqstan».
Aqtóbe oblysy.
