Keshe Qaraǵandynyń «Shahter» komandasy Chempıondar lıgasynyń úshinshi irikteý kezeńiniń alǵashqy oıynynda Albanııanyń «Skenderbeý» klýbymen kezdesip, 3:0 esebimen jeńiske jetti.
Bul match elordanyń «Astana Arena» stadıonynda asa qyzyqty jáne tartysty jaǵdaıda ótti. Kezdesýde «Shahter» salǵan betten shabýylǵa shyǵyp, qarsylastar qaqpasyna birinen soń biri qaýipti jaǵdaılar jasap otyrdy. Sondaı sátterdiń birinde qaraǵandylyqtardyń oıynshysy Djılıch esep ashyp, komandasyn alǵa shyǵardy. Osydan keıin de «Shahter» albandardyń aıyp alańynan shyqpaı, esepti eseleýge bar kúshin saldy. Biraq qonaqtardyń qorǵanysyn buza almaǵan alań ıeleri birinshi taımda jalǵyz ǵana gol soǵa aldy. Oıynnyń ekinshi jartysynda Roman Murtazaev pen Sergeı Hıjnıchenko bir-bir goldyń avtory atandy.
Jalpy, bul kezdesýde «Shahterdiń» budan da úlken eseppen jeńiske jetýge múmkindikteri boldy. Máselen, oıynnyń birinshi taımynda qarsylastar qaqpasyna bir emes, birneshe dop soǵýǵa múmkindigi bolsa da, «Shahterdiń» barlyq oıynshylary mundaı sátti tıimdi paıdalana almady. Ekinshi taımda da jaǵdaı osylaı qaıtalandy. Bul matchta «Shahterge» Eýropa komandalarymen oıynda áli de tájirıbe jetispeıtindigin kórdik. Osyndaı úlken eseppen jeńýge bolatyn oıynda otandastarymyz úsh goldy ǵana qanaǵat tutty.
Endi kelesi oıyn 6 tamyzda Albanııanyń Tırana qalasynda ótedi. Osy kezdesýde alań ıeleri «Shahterdi» 4 dop aıyrmashylyǵymen jeńbese, qaraǵandylyqtar Chempıondar lıgasynyń pleı-off kezeńine shyǵady. Eger onda qarsylasyn jeńse, toptyq kezeńge, al jeńilse, Eýropa lıgasynyń toptyq týrnırine qatysady.
Dastan KENJALIN,
«Egemen Qazaqstan».
