Búginde ońaı oljaǵa qunyqqandardyń dánikkenderi sonshalyq, aldap-arbaýdyń túrli ádis-aılalaryn meńgerip, qarapaıym halyqty qan qaqsatýda. Buǵan dálel IID baspasóz qyzmetiniń jetekshisi Ardager Ýaıdınniń aıtýynsha, taıaýda IID-niń kezekshi bólimine 34 jastaǵy Embi turǵyny habarlasyp, 19 sáýirde Áýe qalashyǵy aýdanynda 33 jastaǵy áıeldiń oǵan nesıe alyp berýge kómektesetinin aıtyp, 52 myń teńgesin alyp ketkendigin habarlady. Krımınaldy polısııa kúdiktini qolǵa túsirdi. Ile-shala polısııa qyzmetkerleri 35 jastaǵy taǵy bir áıeldi ustaǵan. Ol tyıym salynǵan páterdi alyp beremin dep, eki áıeldiń birinen 80 myń, ekinshisinen 800 myń teńge alyp, aldap ketken. 46 jastaǵy taǵy bir aqtóbelik jóndeý jumystaryn júrgizýge ýáde berip, 28 jastaǵy jigittiń 200 myń teńgesin qaǵyp ketipti.
Polısııaǵa shaǵymmen kelgen 38 jastaǵy áıel óziniń tanysy 35 jastaǵy qurbysynyń úıine kelip, «Nurbank» AQ arqyly tómen baǵa boıynsha páter alýǵa kómektesetinin aıtyp, 80 myń teńgesin qoldy qylǵanyn aıtqan. Al 26 jastaǵy qyz bala 27 jastaǵy tanyńqyramaıtyn bir jigittiń nesıeni tólep turamyn degenine senip, onyń atyna «Kaspıı bankinen» nesıe rásimdep, «Sýlpak» saýda úıinen túrli-tústi teledıdar alyp bergen. Qyz senimine kirgen azamat keıin izin sýytyp, kórinbeı ketken. Aqsha tabýdyń aram jolyn tańdaǵan aqtóbelik alaıaqtar bettiń aryn belge túıip, ańqaýlardyń aýzyn aıǵa qaratyp ketýge ábden daǵdylanyp alǵan. Qazir kim-kóringenge senetin kez emes. Sondyqtan «maıshelpek» jaýdyrýǵa daıyn «pysyqtarǵa» aldanyp qalmaýǵa tyrysý kerek. «Bul ne degen batpan quıryq, aıdalada jatqan quıryq» degendeı, zańdy aınalyp ótip, ıgilikke qol jetkizemin deý áýreshilik ekenin udaıy este ustaǵan jón.
Satybaldy SÁÝIRBAI,
«Egemen Qazaqstan».
Aqtóbe oblysy.
