Keshe Qazaqstan Respýblıkasy Premer-Mınıstriniń birinshi orynbasary - О́ńirlik damý mınıstri Baqytjan Saǵyntaev jumys saparymen Qyzylorda oblysyna bardy. Bul týraly О́ńirlik damý mınıstrliginiń baspasóz qyzmetinen habarlandy.
Kúnniń alǵashqy jartysynda birinshi vıse-premer «Syrdarııa ózeni arnasyn retteý jáne Aral teńiziniń soltústik bóligin saqtaý» jobasy aıasynda salynǵan Kókaral plotınasynyń jumysymen tanysty. Atalǵan joba Aral aýdanynyń áleýmettik-ekonomıkalyq jaǵdaıyn jáne ekologııalyq tepe-teńdikti jetildirý, sonymen qatar óńirde balyq sharýashylyǵyn damytý maqsatynda júzege asyrylýda.
Aral qalasynda Baqytjan Saǵyntaev 2009 jyly paıdalanýǵa berilgen Araldyń balyq ónimderin qaıta óńdeý zaýytynda boldy. Zaýyttyń barlyq úı-jaılary Eýroodaq elderine balyq ónimderin júzege asyrý úshin sanıtarlyq-gıgıenalyq normalardyń talaptaryna (NASSR) sáıkes salynǵan. Sonymen qatar, Aralda birinshi vıse-premer «Qoljetimdi turǵyn úı - 2020» baǵdarlamasy aıasynda turǵyzylyp jatqan úılerdiń qurylysyn qarap shyqty.
Birinshi vıse-premer Qazaly aýdany Áıteke bı kentinde 660 bas iri qara maldyń sútin óndiretin keshenniń jáne «RZA» AQ sút ónimderin óńdeý zaýytynyń jumysymen tanysty.
Odan ári Baqytjan Saǵyntaev Ǵanı Muratbaev aýyldyq okrýginde bolyp, onda aýyl ákimderiniń saılaýǵa daıyndyq barysy jónindegi aqparatty tyńdady jáne okrýgtiń áleýmettik-ekonomıkalyq damýymen tanysty.
Kúnniń ekinshi jartysynda birinshi vıse-premer aǵymdaǵy jylǵy 2 shildede «Baıqońyr» ǵarysh aılaǵynan shyǵarylǵan «Proton-M» zymyran tasyǵyshy qulaǵan aýmaqty qarap shyqty.
Baqytjan Saǵyntaev «Gagarınskıı start» alańynda jáne «Baıqońyr» kosmodromynyń murajaı kesheninde boldy. Qarmaqshy aýdanynda birinshi vıse-premer Tóretam aýylyndaǵy 100 adamnyń kelýine arnalǵan aýrýhananyń jańa ǵımaratyn qarap shyqty.
Baıqońyr qalasynda Premer-Mınıstriniń birinshi orynbasary «Proton-M» zymyran tasyǵyshy qulaǵan aımaqtaǵy zardaptardy joıý jónindegi jumys komıssııasynyń qorytyndylary boıynsha keńes ótkizdi. «Proton-M» zymyran tasyǵyshy qulaǵan aımaqtaǵy teris ekologııalyq zardaptardy joıý jónindegi is-sharalardy ótkizýdi baqylaý týraly Premer-Mınıstriniń ókimimen qurylǵan jumys komıssııasynyń qorytyndylary jóninde Qorshaǵan ortany qorǵaý mınıstri Nurlan Qapparov baıandady. Keńes jumysyna sonymen qatar Qyzylorda oblysynyń ákimi Qyrymbek Kósherbaev, QR Ulttyq ǵarysh agenttiginiń basshysy Talǵat Musabaev, RF Federaldy ǵarysh agenttiginiń basshysy Vladımır Popovkın jáne t.b. qatysty. Baqytjan Saǵyntaev zymyran tasyǵyshtyń qulaǵany týraly jaǵdaı boıynsha Qazaqstannyń alańdaýly ekendigin atap ótti. Birinshi vıse-premer bolǵan apattyń «Baıqońyr» kesheniniń qyzmetimen baılanysty ekologııalyq máselelerdi ekijaqty tártipte jáne keshendi sheshetin ýaqyt kelgenin málimdedi. Sonymen qatar qazaqstandyq tarap joǵary toksındik otyndy qoldanatyn zymyran tasyǵyshtardy qoldanýǵa berýdi jyldamyraq kezeńmen qysqartyp, asa qaýipsiz ekologııalyq ǵarysh zymyrandar keshenderin paıdalanýǵa aýysýǵa múddeli.
Keńes qorytyndysy boıynsha Baqytjan Saǵyntaev múddeli memlekettik organdarǵa birneshe tapsyramalar berdi, atap aıtqanda QR Úkimeti jáne RF Úkimeti arasynda Reseı Federasııasynyń jalǵa alý sharttary boıynsha «Baıqońyr» keshendi aımaǵyndaǵy ekologııa jáne tabıǵatty paıdalaný máseleleri jónindegi kelisimge kelý úshin qosymsha hattamaǵa qol qoıý rásimin jyldamdatý qajet. Bul Qazaqstannyń ekologııalyq kodeksiniń mindetterin «Baıqońyr» kesheni aımaǵynda qoldanýǵa múmkindik beredi. Sonymen qatar Qazaqstan Reseı tarapynyń aýmaqtaǵy turǵyndardyń densaýlyǵyna jáne óńirdiń ekologııasyna zııan keltirilgeni úshin ótemaqy tóleý máselelerin qarastyrýy qajet dep sanaıdy.
Keńeste «Baıqońyr» keshenin birlese qoldaný týraly jol kartasyn ázirleý, ǵarysh aılaǵyn birge qoldaný tártibin belgileýde memleketaralyq jańa kelisim daıyndaý, sondaı-aq Baıqońyr qalasyn damytý perspektıvalary jónindegi máseleler talqylandy.
Sáken Maılybaı.
