Memleket basshysy Qasym Jomart Toqaev óziniń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty halyqqa Joldaýynda «Halyq únine qulaq asatyn memleket» tujyrymdamasy týraly bastama kóterip, onyń barlyq azamattardyń ótinishterine jedel jáne tıimdi áreket etýge baǵyttalýy tıis ekenin atap ótken bolatyn. Bul rette Prezıdent memlekettik apparat qyzmetindegi problemalar kóbinese azamattar men jergilikti jerlerdegi sheneýnikter arasyndaǵy keri baılanystyń bolmaýyna baılanysty ekendigine nazar aýdarǵan edi.
Otyrysta halyqpen tikeleı jáne keri baılanys arnalarynyń jumysyndaǵy problemalar negizinde ázirlengen «Halyq únine qulaq asatyn memleket» tujyrymdamasyn iske asyrý tásilderi tanystyryldy. Máselen, qazirgi ýaqytta memlekettik organdardyń turǵyndarmen ózara is-qımylyna azamattardyń ótinishterimen jumys isteý júıeliliginiń jáne memlekettik organdardyń proaktıvtiliginiń bolmaýy áser etedi.
«Biz osy máselelerdi sheshý úshin halyqpen tikeleı jáne keri baılanys arnalarynyń jumysyn júıeli monıtorıngileý jáne taldaý, BAQ, ÚEU jáne halyqtan túsken saýaldarǵa jedel den qoıý, joǵary ortalyqtandyrylmaǵan júıeden «tómennen joǵary» prınsıpine kóshý, memlekettiń halyqpen elektrondy formatta ózara is-qımyly boıynsha «biryńǵaı tereze» qurý, memlekettik organdardyń ashyq otyrystaryn onlaın-translıasııalaý, ashyqtyqtyń vedomstvolyq josparlaryn ázirleý jáne bekitý, memlekettik organdardyń ashyqtyǵy mádenıetin qalyptastyrý, áleýmettik saýaldama júrgizý sııaqty tásilderdi usynamyz», dep atap ótti Aqparatqa qol jetkizý salasyndaǵy memlekettik saıasat departamentiniń dırektory Bekzat Raqymov.
Mınıstrliktiń ókilderi usynǵan tásilder jumys tobynyń músheleri tarapynan qoldaý tapty. Sonymen qatar qatysýshylar «Halyq únine qulaq asatyn memleket» tujyrymdamasyna arnalǵan tásilderdi tolyqtyrý maqsatynda mynadaı usynystar aıtty.
Parlament Májilisiniń depýtaty Serik Seıdýmanov bul tujyrymdama qoǵamnyń barlyq salalaryn qamtýy kerek ekenin atap kórsetti.
«Halyqpen keri baılanys máselelerin sheshý, bulardyń bári durys, biraq jalpy eldegi jaǵdaıǵa monıtorıng júrgizý, problemaly aımaqtardy anyqtaý qajet. Eldiń ereksheligin eskere otyryp, memlekettik basqarý júıesin jetildirý jáne memlekettik qyzmetshilerdiń kásibıligin arttyrý talap etiledi», dep atap ótti Serik Seıdýmanov.
«Talap» qoldanbaly zertteýler ortalyǵy» qoǵamdyq qorynyń dırektory Raqym Oshaqbaev tujyrymdamada jańa trendti – memlekettiń responsıvtiligin teris paıdalanýdy kórsetýdi, sondaı-aq tujyrymdamany ázirleý kezinde «Open Government Partnership» ádisnamasyn paıdalanýdy usyndy.
«Memlekettiń turǵyndardyń pikirin elemeýine adamdardyń ózderiniń belsendi bolmaýy áser etedi. Halyqty ekonomıkalyq qaýymdastyqtarǵa birigýge úıretý qajet. Sondaı-aq (anyqtama: Key Performance Indicator – tıimdiliktiń negizgi kórsetkishi) memlekettik organdardyń halyqpen ózara is-qımylynyń KPI júıesin engizý qajet», dep atap ótti Qazybek Shaıh.
Budan bólek, «Internews Kazakhstan» uıymynyń zańgeri Olga Dıdenko uıym atalǵan tujyrymdamany ázirleýde memlekettik organdardyń medıa salasymen ózara is-qımyly bóliginde qoldaý kórsetýge daıyn ekenin aıtty.
Halyqaralyq kommersııalyq emes quqyq ortalyǵynyń Ortalyq Azııadaǵy quqyqtyq ortany jetildirý baǵdarlamasynyń jetekshisi Gúlmıra Kýjýkeeva tujyrymdamany iske asyrý úshin zańnamaǵa ózgerister engizý qajettigin atap ótti. Onyń aıtýynsha, «Halyq únine qulaq asatyn memleket» qyzmettiń ashyqtyǵyna negizdelgen, birinshi kezekte Ákimshilik quqyq buzýshylyq týraly kodekske jáne «Aqparatqa qol jetkizý týraly» zańǵa tıisti ózgerister engizý qajet.
Jumys tobynyń músheleri tujyrymdamada qoǵamdyq keńester men jergilikti ózin ózi basqarý organdarynyń (máslıhattardyń) rólin kórsetý qajettigin kóldeneń tartty.
Otyrys qorytyndysy boıynsha qatysýshylar jumys tobynyń otyrystaryn turaqty túrde ótkizý týraly sheshim qabyldady.
Aıta ketý kerek, «Halyq únine qulaq asatyn memleket» – bul barynsha ashyq jáne esepti memleketti qalyptastyrý. Sondyqtan tujyrymdamany ázirleý barysynda, birinshi kezekte, halyqtyń pikiri barynsha eskerilýi tıis.
Ǵabıt JÁDIGER
