Áskerde tártip bolmasa...

Áıtpese Ordabasy aýdany Badam eldi mekeni janyndaǵy 10 216 áskerı bóliminen 30 avtomat, 27 pıstolet, 2 PMT, 420 dana 5,45 kalıbrli, 24 dana 9 mm kalıbrli patrondar urlanbas edi. Ereje, áskerı tártip saqtalsa, qańtar aıynyń sońynan, aqpannyń jıyrmasyna deıin qarý men oq-dáriler qoldy bolmas edi. Iá aqpannyń 20-synda jarııa bolǵan urlyqtyń sońǵysy 19 kúngi túngi 23-ter shamasynda bolǵan. Al tańǵy saǵat 7.30-da kezekshi shuǵyl oqıǵa jaıynda aqparat alǵan. Áskerı qyzmetshi Abylaı Balǵynbaıdyń qyzmet ornyn tastap, qarý-jaraq alyp ke­tkeni belgili bolady. Aǵa leıt­enant Shorasýlovtyń ornyna kezekshilik atqarǵan sarbaz ofıserdiń qaltasynan qarý-jaraq qoıma­sy­nyń kiltin baıqatpaı alǵan.

Kúzet dabylyn óshirip, qarý-jaraqtardy kóter­geninshe alyp shyqqan. Kiltti qaıtadan kezekshiniń qaltasyna salýdy da umytpaǵan kórinedi. Qarý-jaraq buǵan deıin de urlanǵan. «Qańtardyń sońynan bas­tap aqpan aıynyń ortasyna deıin qarý-jaraq qoımasyna ózdiginen kirýge ruqsat alǵan sarbaz kúnine bir-eki qarýdan urlap ketip júrgen. Keıin bul qylmysqa dostaryn tartqan. Qarýlardyń basym bóligi 20 aqpanǵa qaraǵan túni urlanǵan», dedi Ishki ister mınıstrligi Tergeý bas­qar­masynyń bastyǵy Sanjar Ádilov jýrnalısterge bergen suhbatynda.

UQK men IIM birlesken jedel-ter­geý toby ur­­lyqqa qatysy barlardyń bar­lyǵyn izin sýytpaı ustap, qarýlardy tár­kiledi. Satylǵan eki tapansha da tabylǵan. Qazirgi ýaqytta Qor­ǵanys mınıstrligi Túrkistan ob­lysynda orna­las­qan áskerı bólimde qarý-jaraqtardy qo­sym­sha túgendeý jumystaryn júrgizip jatyr. «Sonymen qa­tar úsh laýazymdy tulǵa, atap aıt­qanda dıvızııa komandıri, jedel kezekshi, sondaı-aq keli­simshart boıynsha qyzmet etken qatardaǵy sarbaz áskerı qyz­met erejelerin buzǵan jáne qarý­dyń urlanýyna ákelip soqqan nemquraıdylyqtary úshin qa­zirgi ýaqytta ustalyp, qamaýǵa alyndy», dedi Sanjar Ádilov. Ter­geý málimetteri boıynsha keli­simshartpen áske­rı qyzmet atqarǵan serjant A.Balǵynbaı 1995 jáne 1996 jylǵy syrttaǵy eki dosymen 29 avtomat, 24 tapansha alyp qashqan. Ishki ister mınıstrligi 291 (qarýdy, oq-dárilerdi, jarylǵysh zattar men jarylys qurylǵylaryn jym­qyrý ne qorqytyp alý) jáne 453-baptar (qyzmetke salǵyrt qaraý) boıynsha qylmystyq isterdi tirkegen. Tergeý sotynyń sanksııasymen ustalǵan adamdar qamaýǵa alynǵan. «Sonymen qatar jekelegen laýazymdy adam­dardyń, onyń ishinde áskerı bólim basshylyǵynyń qyzmettik min­detterge nem­quraıdy qara­ǵany úshin jaýap­ker­shilikke tartý týraly máse­le­si qarastyrylýda. Ter­geý jal­ǵasyp jatyr», dedi Ter­geý basqarmasynyń bastyǵy.

Bul oqıǵaǵa qatysty kúdik­ti­­ler tıisti jazasyn alar. Al kóp­shilik búginde turaqty jumys orny, jalaqysy bar 25 jastaǵy jigittiń qylmysqa barǵanyn túr­lishe jorýda. Áskerı qyz­metke ornalasýdyń ózi ońaı emes, birneshe tekserý­den ótedi. Onymen qoımaı jas ji­git jamanatty bolmaǵan. Aýyl­das­tary da jas jigit­ti jamandyqqa qımaı­dy. Qara­paıym, tárbıeli azamat ekenin aıtady. Kóp balaly otbasynda ósken. Al onyń ákesi aýyldaǵy syıly aza­mat­tardyń biri. Abylaı uldan úı­diń úlkeni, onyń mektepte oqı­tyn inileri men stýdent ápkesi bar eken. Áskerge deıin Shym­kentte arnaıy orta bilim alǵan. Osyndaı azamattyń teris jolǵa tú­sýine, ant­tan attaýyna qandaı orta nemese qandaı jaǵdaı sebep bolǵany ázirge belgisiz.

Túrkistan oblysy