Solaı bolyp ta júr. Onyń aldyn alýdyń bir joly kóshedegi qardy tıep, qalanyń syrtyna tasymaldaý jáne muzdaqtyń ústine qum nemese tuz sebý jumystaryn júıeli túrde júrgizý.
Áıtse de Aqtóbe qalasynda bulaı bolmaı otyr. Qalalyq ákimdik tarapynan atalǵan isterdi atqarýmen aınalysatyn merdigerlik kompanııalarǵa qoıylatyn talaptyń tómendiginen kóktaıǵaq áli de qaýipti.
Oblys ortalyǵyndaǵy qala kóshelerin qardan jáne kóktaıǵaqtan tazalaý jumystaryn segiz kompanııa memlekettik satyp alýlar arqyly utyp alypty. Sol ýaqytta qujattarynda eshqandaı min bolmasa, keıinnen «túıelerin kópirden ótkizip alǵan» soń olar jumysshylar sanynyń azdyǵyn jáne tehnıka jetispeýin kóldeneń tartyp ártúrli syltaýlardy qaptatyp jibergen. Búginde memleket qarjysyn qaltalaryna salyp alǵan «Avtolaın», «Tabys el», «Boshan TransAvto», «Erhat joldary», «Kokvest», «Barlyq Qurylys» JShS kompanııalary jalpy kólemi 5,5 mln sharshy metrdi quraıtyn 711 kósheni qar men kóktaıǵaqtan tazalaýy tıis. Áıtse de olardyń qazirgi is-qımyldary mardymsyz, tipti joqqa tán ekeni qala turǵyndarynyń oryndy ókpe-renishin týǵyzyp júr.
Qalada ótkiziletin memlekettik satyp alý jónindegi konkýrstar kezinde memleket qarjysy osylaı tekten-tekke shashylyp kete bere me? Bul jaǵdaıda jergilikti atqarýshy organdar tarapynan belgili bir kompanııalarǵa qoıylatyn talaptyń tómendigi men kelisimsharttardyń bosań, jalpylama jasalǵany aıqyn kórinedi. Munyń ózi eń aldymen Aqtóbe qalasynyń ákimi Mavr Abdýllınniń qyzmetine úlken syn bolmaq. Sondyqtan da aldaǵy ýaqytta árbir merdiger kompanııanyń atqaratyn qyzmetiniń aýqymy men kólemi naqty kórsetilse, enjarlyq pen sylbyrlyq qaıtalanbas edi.
AQTО́BE
