Bul – otandyq fýtboldyń jarqyn jeńisi
Keshe túnde «Astana-Arena» sport kesheninde Chempıondar lıgasynyń pleı-off kezeńiniń birinshi oıynynda Qaraǵandynyń «Shahteri» Shotlandııanyń «Seltıgin» qabyldady. Tartysty da, qyzyqty ótken match 2:0 esebimen jerlesterimizdiń paıdasyna sheshildi.
Bul – otandyq fýtboldyń jarqyn jeńisi
Keshe túnde «Astana-Arena» sport kesheninde Chempıondar lıgasynyń pleı-off kezeńiniń birinshi oıynynda Qaraǵandynyń «Shahteri» Shotlandııanyń «Seltıgin» qabyldady. Tartysty da, qyzyqty ótken match 2:0 esebimen jerlesterimizdiń paıdasyna sheshildi.
Bul naǵyz «kórgen de armanda, kórmegen de armanda» deıtindeı oıyn boldy. Olaı bolatyn da jóni bar. «Seltık» – Eýropadaǵy eń beldi de bedeldi komandalardyń biri. Buǵan deıin Qazaqstan klýbtaryna mundaı deńgeıdegi ujymmen ushyrasýdyń reti kele qoıǵan joq edi. Osy jyly alǵash ret Chempıondar lıgasynyń eki kezeńinen sátti ótken kenshiler jasaǵy úshin mundaı qarsylaspen kúsh synasý taǵdyrdyń bergen syıy ispettes-tin. Sondyqtan qaraǵandylyqtar osy múmkindikti tıimdi paıdalanyp, shaıqasqa baryn salýǵa umtyldy.
Biraq oıyn bizdiń qaýip etkenimizdeı, á degennen «Seltıktiń» shabýylymen bastaldy. Glazgonyń saıypqyran sarbazdary matchtyń 3-mınýtynda bizdiń qaqpaǵa eki birdeı buryshtama berip, aıtarlyqtaı qater týǵyzdy. Arada 3-mınýt ótkende osy jaǵdaı taǵy qaıtalandy. Bizdiń fýtbolshylar osydan keıin ǵana baýyrlaryn jazyp, alǵa qaraı jóńkile shapty. Sonyń nátıjesinde 12-mınýtta komanda kapıtany Andreı Fınonchenko qaqpa aldyndaǵy qarbalasty utymdy paıdalanyp, esep ashyp úlgerdi. Osydan keıin oıyn negizinen teń jaǵdaıda ótip jatty.
Meımandar ekinshi taımnyń basyn da óz yqpalynda ótkizdi. Alaıda, kóp uzamaı shahterlikter oıyndaǵy tepe-teńdikti qalpyna keltirip, qaıtadan shabýylǵa kóterile bastady. Shabýyldyń yńǵaıly sátinde shabýylshy Sergeı Hıjnıchenko taǵy bir gol soǵyp, jerlesterimizdiń aıbynyn asyra tústi. Budan keıin de eki komandanyń bir-birlerine gol soǵatyndaı múmkindikteri boldy. Degenmen, ýaqyt uzaǵan saıyn senimdilikteri bekı bergen bizdiń fýtbolshylar alańda ózderin barynsha yjdaǵatty ustap, osy esepti matchtyń sońyna deıin jetkizdi.
Qarymta oıyn tamyzdyń 28-i kúni Glazgo qalasynda ótedi.
Serik PIRNAZAR,
«Egemen Qazaqstan».
