Eriktilerdiń kómegimen ushty-kúıli habar-osharsyz ketken júzge jýyq azamat tabylǵan. Polısııa departamenti qoǵam tynyshtyǵy úshin basyn qaterge tigip, der kezinde tártip saqshylaryna kómek qolyn sozǵan 255 eriktige bir jyldyń ishinde 5 mıllıon teńgeden astam aqshalaı syılyq taǵaıyndaǵan.
Birneshe áleýmettik jelilerde tikeleı baılanys arqyly turǵyndarǵa esep bergen oblystyq Polısııa departamentiniń bastyǵy Beket Aımaǵambetov osy jáne budan basqa da máseleler tóńireginde sóz qozǵady.
– Men bul eseptik kezdesýdi azamattardy qabyldaý, olardyń ózekti máselelerin sheshý alańy retinde qarastyramyn, – degen óńirlik polısııa basshysy búginde quqyq qorǵaý organdary halyqqa qyzmet kórsetýdiń jańa úlgisine kóship jatqanyn aıta kelip. – Sońǵy jyldary halyqtyń polısııaǵa degen senimi artyp keledi. Bul óz mindetin múltiksiz atqaratyn antyna adal tártip saqshylarynyń jumys nátıjesinde qol jetken tabys. Máselen, ótken jyly oblys ortalyǵynda birneshe páter tonaý qylmysy tirkelgen bolatyn. Búginge deıin solardyń barlyǵy ashyldy. Qylmyskerler jazasyn alyp, 1 mıllıon teńgeden astam qoldy bolǵan qarjy ıelerine qaıtaryldy. Polısııa qyzmetkerleri ótken jyly sot pen tergeýden qashyp júrgen 104 qylmyskerdi izdep taýyp, ádiletti zańnyń ústemdik alýyna qol jetkizdi, – dedi.
Generaldyń aıtýynsha, oblystyń irgeli eldi mekenderindegi turǵyn úı aýlalaryn bıyl ekinshi jyl jaıaý patrýldik qyzmet kúzetedi. Osynyń arqasynda kóshe qylmysy 22%, al qoǵamdyq oryndardaǵy qylmys deńgeıi eki ese azaıǵan. О́ńirde, ásirese, adam óltirý, zorlyq-zombylyq jasaý, urlyq, tonaý, bopsalaý sııaqty aýyr jáne asa aýyr qylmys túrleri edáýir azaıǵany baıqalady.
Bıyl aqpan aıynyń basynda oblys polıseıleri ishimdik iship alyp rýlge otyrǵan júrgizýshilerge qarsy ymyrasyz kúres bastaǵan. Bas polıseı bul jóninde de aqpar berdi. Bir aı ishinde tártip saqshylary masań kúıinde kólik júrgizgen 197 adamdy ustaǵan. Onyń 138-i 7 jylǵa avtokólik júrgizý quqynan aıyrylypty. Qalǵandarynyń isi sot qaraýynda jatyr.
Qostanaı
