Keshe «Nur Otan» HDP Ortalyq apparatynyń qoǵamdyq qabyldaý bólmesinde Aýyl sharýashylyǵy mınıstri Asyljan Mamytbekov azamattardy jeke máseleleri boıynsha qabyldady.
Keshe «Nur Otan» HDP Ortalyq apparatynyń qoǵamdyq qabyldaý bólmesinde Aýyl sharýashylyǵy mınıstri Asyljan Mamytbekov azamattardy jeke máseleleri boıynsha qabyldady. Jyl basynan beri Aýylsharýashylyǵy mınıstr ijáne mınıstrlik ókilderi partııanyń Ortalyq apparatynda 33 adammen júzbe-júz sóılesip, olardyń máseleleriniń sheshimin qarastyrypty. Munda kelgender negizinen jumysqa ornalasý, «Dıplommen – aýylǵa!» baǵdarlamasy aıasynda baspana alý, qoı terisin óńdeý, omarta sharýashylyǵymen aınalysý, jerdi sýlandyrý jáne mal sharýashylyǵyn damytý boıynsha nesıe alý sııaqty máselelerdi kótergen. Sonyń ishinde oń sheshimin tapqandary da bar. Mysaly, Aqmola oblysy, Selınograd aýdany, Maksımov aýylynyń turǵyny Mettanel Úmbetovaǵa «Dıplommen – aýylǵa!» baǵdarlamasy aıasynda baspana úshin 2 mıllıon 300 myń teńge kóleminde qarajat bólinipti. Al Shyǵys Qazaqstan oblysy, Tarbaǵataı aýdany, Qabanbaı batyr aýylynyń turǵyny Baqaıaq Saılaýǵa asyl tuqymdy iri mal basyn ósirý úshin 2 mıllıon 200 myń teńge kóleminde qarajat berilgen.
Al keshegi qabyldaýǵa kelgen Qaraǵandy oblysy, Jańaarqa aýdany, Túgisken aýylynyń turǵyny Berik Rashatov mınıstrmen qoı sharýashylyǵyn damytý máselesi boıynsha pikir almasty. Onyń sózine qaraǵanda, bir kezderi «Saryarqa» qoı tuqymy órken jaıyp, damyǵan bolsa, qazir ol quryp barady. Jeke sharýashylyqtarda jumys isteıtinderdiń jaǵdaıy nashar bolǵandyqtan, olardy toptastyrý qajet degendi alǵa tartty. Buǵan jaýap retinde A.Mamytbekov qazir naryqtyq zaman bolǵandyqtan, jekeniń máselesine aralasa almaıtyndyqtaryn, ony sharýalardyń ózderi sheshýi qajet degendi aıtty. Mınıstrdiń málimdeýinshe, bıyldan bastap analyq basqa sýbsıdııa tóleý qolǵa alynǵan. Onyń ústine Úkimet Salyq kodeksine tıisti ózgerister engizý arqyly aýyl sharýashylyǵynda eńbekaqy tóleý máselesin yntalandyrýdy qolǵa alýda. 2011 jyly engizilgen iri qara mal analyǵyna sýbsıdııa berýdiń arqasynda mal basy 20-22 paıyzǵa ósip otyr.
Jeke kásipker Evgenıı Novak óz fırmasyna burǵylaý úshin jumys aýqymyn qamtamasyz etýge yqpal etýin surap, mınıstrdiń osy máselege qolushyn berýin ótindi. Kásipkerdiń aıtýynsha, ol búgingi kúnge deıin 400-ge tarta uńǵy qazǵan. Qazirgi tańda bul fırma iri kásipkerler, qorǵanys vedomstvosy jáne ózge de tapsyrys berýshiler tarapynan tapsyrystar qabyldaýda kórinedi. Mınıstr kásipkerdiń usynysyn tyńdap bolǵan soń, aýyl sharýashylyǵy salasynda fermerlerdi muqtajdap, qudyqtar men uńǵylardy qazdyrý durys emestigine nazar aýdartty. Negizinen, mundaı jumystardy fermerler ózderi atqara alady. Sondyqtan, mundaı qyzmet túrlerin ashyq naryqtan izdeý qajettigin, ásirese, bıznes assosıasııalary arqyly izdegen durys degendi aıtty.
Al Astanada «Ekosfera-Qazyǵurt» halyqaralyq ǵylymı ortalyǵyn qurǵan Amanbek Aqaıuly mınıstrge agro-ekologııalyq qaýipsizdigin damytý týraly usynystarymen kelgendigin jetkizdi. Ǵalymnyń usynystary ǵylymı negizde dáıektelgendikten, onymen jaqyn tanysý úshin birneshe jobalardy mınıstrge tabys etti.
Jalpy, esepti kezeńde Ortalyq apparatttyń qoǵamdyq qabyldaý bólmesine mal basyn kóbeıtý, qus ósirý, qalalyq jáne aýyldyq jerlerde jylyjaılar salý, jemis-jıdek alqabyn ulǵaıtý jáne jeke sharýa qojalyqtaryn damytý sııaqty usynystarmen 41 adam kelgen eken. Qabyldaýǵa kelgen azamattarǵa elimizdiń qoldanystaǵy zańdary boıynsha túsinikter men keńester berilip, jazbasha ótinishter quzyretti organdarǵa qaraý úshin jiberilgen.
Asqar TURAPBAIULY,
«Egemen Qazaqstan».
