Sýretterdi túsirgen avtor
Batys Qazaqstan oblysy ortalyǵynyń Zashaǵan kenti aýdanynda ornalasqan jańa meshittiń qazyǵy osydan úsh jyl buryn, 2023 jyly mamyr aıynda qaǵylǵan edi. Sodan beri demeýshiler men dindár jamaǵattyń qoldaýymen sáýletti meshit boı kóterip, qasıetti ramazan aıynyń bastalýyna 2 kún qalǵanda paıdalanýǵa berildi. Bul Oral qalasyndaǵy tórtinshi, oblys boıynsha 66-nshy meshit.
Bas múftı óz sózinde Oral turǵyndaryn jańa meshittiń ashylýymen quttyqtap, Aqjaıyq óńiri, Batys Qazaqstan oblysy áýelden musylman dininiń týy tigilgen, ata-baba dástúri saltanat qurǵan aımaq ekenin aıtty.
«Jáńgir han babamyzdyń ýaqytynda Bókeılik jurtynda 144 meshit bolǵan eken. Jáńgir han ár 170 shańyraqqa bir molda bolýyn tártip etip bekitken. Ol kezdegi moldalar eldi ımandylyqqa, aǵartýshylyqqa, saýattylyqqa jetkizgen ustaz boldy. Qazir de solaı, Allaǵa shúkir, oblystaǵy Samat Qanatqalıuly bastaǵan ımamdarymyz halyqqa adal qyzmet etip keledi. Qoja Ahmet Iаsaýı babamyzdyń da bizge aıtqan ósıetteriniń biri sol: Haqqa qyzmet etý – halyqqa qyzmet etýden bastalady degen. Halyqqa qyzmet etý úshin adam qarapaıym, kishipeıil bolý kerek. Minekı, babalarymyz, din ustanǵan qasıetti áýlıelerimiz bizge osyndaı ósıet qaldyrǵan. Osy óńirde de Haq jolyna aıanbaı qyzmet etken, sol jolda qurban bolǵan Qýanaı haziret sııaqty tulǵalar bolǵan. Sondyqtan biz de babalar jolyna berik bolyp, Allaǵa ımanymyz myqty bolyp, Qudaıdyń buıryǵyna boıusynyp, qaıtarǵan isterinen tyıylyp, qolymyzdan kelgenshe adam balasyna jaqsylyq jasaý arqyly Allaǵa ımandy bolaıyq», dedi bas múftı.
Naýryzbaı qajy Taǵanuly budan keıin kıeli Mekkege, qasıetti qaǵbaǵa Memleket basshysymen birge zııarat qylǵan saparyn eske aldy.
«Men ol kisimen birge Mekkege barǵanymda, ekeýmiz umra jasap, qaǵbany taýap etip bolǵan soń, ary qaraı Safa men Márýaǵa baraıyn dep turǵan edik. Prezıdent qaǵbaǵa qaraı burylyp, «Árbir qazaq baı bolsyn!» dep duǵa qyldy. Árıne, baılyq degen tek dúnıe emes, rýhanı baılyq ta bar. Bul tilekte óte úlken maǵyna bar. Qazaq úshin bala-shaǵanyń kóptigi de baılyq, densaýlyqtyń ózi – zor baılyq. Mine, osy baılyqtyń barlyǵyn bizdiń Memleket basshysy Alladan halqy úshin tilegenine men kýámin, janynda turyp osyny estidim. Alla Taǵala ol kisiniń tilegin qabil etsin», dedi bas múftı.
Naýryzbaı qajy Taǵanuly Qazaqstan musylmandary dinı basqarmasynyń atynan osy meshitti salýǵa úles qosqan oblys basshylaryna, Oral qalasy ákimdigine, kásipkerler men barsha qarapaıym jamaǵatqa alǵys aıtty. Jınalǵan jurt jańa meshittiń ishi-syrtyn aralap kórdi. Úlkender shashý shashyp, balalar talasa terip, ádemi mereke ulasqan kún boldy.
