Bıyl 16-21 qyrkúıek aralyǵynda toǵyzynshy ret ótetin IX halyqaralyq «Eýrazııa» kınofestıvali qazylar alqasynyń quramymen ózgeshelenbek.
Bıyl 16-21 qyrkúıek aralyǵynda toǵyzynshy ret ótetin IX halyqaralyq «Eýrazııa» kınofestıvali qazylar alqasynyń quramymen ózgeshelenbek.
Almatyǵa álemge tanymal kınematografısterdiń birqatary keledi. Al, qazylar alqasyna jańazelandııalyq jazýshy jáne Kann kınofestıvalinde «Altyn palma butaǵy» júldesin jeńip alǵan («Pıanıno») tuńǵysh áıel kınorejısser, sondaı-aq, «Oskar» syılyǵy, Venesııa kınofestıvaliniń «Kúmis arystan» júldesiniń ıegeri Djeın Kempıon tóraıymdyq etpek. Sonymen qatar, qazylar quramynda Kann kınofestıvali syılyǵynyń ıegeri («Altyn palma butaǵy» «Ýboı» fılmi úshin), belgili azııalyq kınorejısser, operator jáne prodıýser Brılıante Mendos, art-haýs janry boıynsha álemdegi bedeldi prodıýserlerdiń biri, ıspandyq prodıýser, rejısser, akter jáne ssenarıst Lýıs Mınarro, belgili amerıkalyq ssenarıst Devıd Frasonı tórelik etedi. Devıd Frasonıdiń ssenarııi boıynsha túsirilgen «Gladıator» fılmi «Oskar» syılyǵyn bes nomınasııa boıynsha jeńip alǵan. Halyqaralyq qazylar alqasynyń quramynda ózimizdiń Emır Baıǵazın de bar. Bıyl aqpan aıynda «Berlınale-2013» halyqaralyq kınofestıvaliniń «Kúmis aıý» júldesin jeńip alǵan 29 jastaǵy jerlesimiz qazylar alqasynyń eń jas múshesi.
Osy arada bıylǵy «Eýrazııa» kınofestıvaline joǵaryda atalǵan ataqty kınojuldyzdardyń kelýine Berlın festıvalindegi tabysymyz oń yqpal etkeni baıqalady.
Atalmysh festıvaldiń jaı-japsaryna qatysty aldyn ala ótkizilgen baspasóz máslıhatynda Sh.Aımanov atyndaǵy «Qazaqfılm» AQ prezıdenti Ermek Amanshaev «Eýrazııa» kınofestıvali búginde álem kınematografısteriniń kásibı alańyna aınalyp kele jatqandyǵyn atady.
– Kez kelgen kınofestıval sol eldiń kınematografııa deńgeıiniń kórsetkishi. Memleket basshysynyń mádenıet salasynda júrgizgen keshendi saıasaty otandyq kınematografııany sońǵy jyldary úlken tabystarǵa jetkize aldy. Bul – elimizdegi kıno óndirisiniń damý úrdisiniń, ulttyq kınematograftyń óskeleń bedeliniń belgisi, – dedi E.Amanshaev.
Sonymen, bıylǵy «Eýrazııa» kınofestıvaline qatysýǵa álemniń túkpir-túkpirinen 170-ten astam kınotýyndy kelip túsken. Onyń ishinen 12 fılm ǵana iriktelip alyndy. Olardyń qatarynda: «Súıiktim» (Italııa, 2013), «Anrı» (Fransııa, 2012) «Meniń ápke-sińlilerim» (Germanııa, 2013), «Vadjda» (Saýd Arabııasy, Germanııa, 2012), «Mazalanba, Sara» (Iran, 2013), «Ilo Ilo» (Sıngapýr, 2013), «Sıkl» (Túrkııa, 2012), «Qymsyný» (Reseı, 2013), «Gúldený» (Grýzııa, 2013), «Qushtarlyq» (Qyrǵyzstan, 2013), «Zarandýd» (Tájikstan, 2013) jáne qazaqstandyq fılm – «Baýyr» (rej. S.Aprymov, 2013 – fılm Venesııa kınofestıvaliniń baǵdarlamasyna iriktelip alyndy).
Festıval aıasynda dástúrli konkýrstan tys «Ortaazııalyq panorama», «Shyǵys-Batys» (batys kınorejısseri – Djeın Kempıon jáne shyǵys kınorejısseri – Brılıante Mendosanyń retrospektıvalary engizilgen) baǵdarlamalar usynylady. Sondaı-aq, World Cinema Fund, Reseı kınosynyń kúnderi jáne «Qarqyndy damýshy qazaq kınosy» baǵdarlamalary bar. Kórermender halyqaralyq kınofestıvalderdiń júldelerine ıe bolǵan qazaqstandyq fılmderdi jáne rejısser Dárejan О́mirbaevtyń retrospektıvalyq fılmderin tamashalaı alady.
«Eýrazııa» kınofestıvaliniń negizgi maqsattarynyń biri Eýropa jáne Azııa elderiniń prodıýserleri arasyndaǵy baılanysty nyǵaıtý bolyp tabylady. Bıylǵy jyly kınofestıvalde kınoqory boıynsha dóńgelek ústel ótkizilmek. Uıymdastyrýshysy – Berlın kınofestıvali janyndaǵy World Cinema Fund dırektory Vınchenso Býno. Atalmysh kınoqor festıvalderde júldeli oryndardy ıelengen jobalarǵa qoldaý kórsetip keledi. Dóńgelek ústelge halyqaralyq jetekshi kınoqorlary men Ortalyq Azııa jáne Qazaqstan aýmaǵynda yntymaqtastyq tájirıbesi bar prodıýserler qatysady.
«Eýrazııa» kınofestıvali aıasynda álemniń jetekshi kınematografısteriniń qatysýymen dástúrli sheberlik dáristeri uıymdastyrylady. Jas kınotanýshylar úshin Fransııanyń belgili kınosynshysy Metıý Darras, amerıkalyq ssenarıst Devıd Frasonı sheberlik dáristerin júrgizbek. Sáti túse bermeıtin sheberlik saǵattaryna óner salasynda oqıtyn joǵary oqý orny stýdentteri men kınematografıster arnaıy iriktelinip alynady. Prodıýserlik boıynsha sheberlik klastaryn amerıkalyq prodıýser «300 spartandyq», «Aleksandr», «Soǵys táńiri: ólimnen de kúshtiler» fılmderin túsirgen Djannı Nýnnarı ótkizbek.
Aınash ESALI,
«Egemen Qazaqstan».
ALMATY.
