Qazaqstanǵa qaıtarylyp alynady
Qazirgi kúnderi Qazaqstannyń Qarjy polısııasy Ábilázovtiń uıymdasqan qylmystyq tobynyń basshylary men belsendi qatysýshylaryn elimizge jetkizý baǵytynda orasan zor jumystar júrgizip jatyr. Ázirge top bastaǵan serke ispettes Muhtar Ábilázovtiń ózi bolmaǵanymen, onyń elden emin-erkin urlap ketken orasan zor kóp aqshasynyń arqasynda júrgen birqatar jandaıshaptaryn Qazaqstanǵa ákelýdiń bir ushy kórinip qalǵan syńaıly. Aıtalyq, uıymdasqan qylmystyq top qurdy jáne onyń qyzmetine qatysty, sondaı-aq, BTA Banktiń aqshalaı qarajatyn urlady jáne zańsyz paıdalandy degen aıyppen halyqaralyq izdeý jarııalanǵan BTA Bank korporatıvtik bıznesi №6 basqarmasynyń burynǵy bastyǵy Veronıka Efımova áne-mine degenshe respýblıkaǵa keltirilip qalýy múmkin.
Qazaqstanǵa qaıtarylyp alynady
Qazirgi kúnderi Qazaqstannyń Qarjy polısııasy Ábilázovtiń uıymdasqan qylmystyq tobynyń basshylary men belsendi qatysýshylaryn elimizge jetkizý baǵytynda orasan zor jumystar júrgizip jatyr. Ázirge top bastaǵan serke ispettes Muhtar Ábilázovtiń ózi bolmaǵanymen, onyń elden emin-erkin urlap ketken orasan zor kóp aqshasynyń arqasynda júrgen birqatar jandaıshaptaryn Qazaqstanǵa ákelýdiń bir ushy kórinip qalǵan syńaıly. Aıtalyq, uıymdasqan qylmystyq top qurdy jáne onyń qyzmetine qatysty, sondaı-aq, BTA Banktiń aqshalaı qarajatyn urlady jáne zańsyz paıdalandy degen aıyppen halyqaralyq izdeý jarııalanǵan BTA Bank korporatıvtik bıznesi №6 basqarmasynyń burynǵy bastyǵy Veronıka Efımova áne-mine degenshe respýblıkaǵa keltirilip qalýy múmkin.
Qylmystyq is materıaldary boıynsha V.Efımova óziniń tikeleı bastyǵy jáne ıdeıalas kósemi M.Ábilázov tizginin ustaǵan qylmystyq toptyń belsendi músheleriniń biri bolǵan. Ol 2005-2009 jyldary Ábilázovtiń uıymdasqan qylmystyq tobynyń baqylaýyndaǵy kompanııalarǵa nesıelerdi rásimdeý arqyly banktiń aqshalaı qarajatyn urlaý úshin aıryqsha ýákilettikter alǵan BTA Banktiń korporatıvtik bıznesi №6 basqarmasyna jetekshilik etken. Keıin basshysymen birge shetelge qashqan. Al 2009 jylǵy 11 naýryzda V.Efımovany qamaýǵa alý syrttaı sanksııalansa, 17 naýryzda oǵan halyqaralyq izdeý jarııalandy. Sol Efımova 2009 jylǵy 3 shildede Máskeý qalasynda ustaldy. 2010 jylǵy 21 sáýirde Reseı Federasııasynyń Bas prokýratýrasy Efımovany qylmystyq jaýapkershilikke tartý úshin Qazaqstanǵa ekstradısııa jasaý týraly sheshim qabyldady.
Alaıda, V. Efımova bul sheshimge qarsy birneshe ret shaǵym túsirdi. Sonyń saldarynan ony elge ákelý biraz kesheýildeı berdi. Degenmen, isti qaraǵan ártúrli deńgeıdegi sottar, onyń ishinde Reseı Federasııasynyń Joǵarǵy Sotynyń Sot alqasy keıin shaǵymdardy qanaǵattandyrýdan bas tartý týraly sheshimder shyǵardy. Osydan keıin «sýǵa ketken tal qarmaıdynyń» kebin kıgen V. Efımova Adam quqyqtary jónindegi Eýropa sotyna da júgindi. Bul sot ta sońynan Qazaqstanǵa jóneltilgen jaǵdaıda Efımovanyń quqyqtary buzylmaıtynyn quptaǵan sheshim shyǵardy. Endi jaqyn ýaqyttarda ol respýblıkaǵa jetkiziletin bolyp otyr.
Buǵan qosa, Qarjy polısııasy agenttigi Qazaqstan Bas prokýratýrasy arqyly BTA Banktiń korporatıvtik bıznesi №6 basqarma bastyǵynyń orynbasary bolǵan Záýre Júnisovaǵa (Aqpenbetova) qatysty ekstradısııalyq materıaldardy Vengrııaǵa joldaǵan bolatyn. BTA Banktiń aqshalaı qarajatyn urlady jáne zańsyz jolmen tabylǵan aqshalaı qarajat pen ózge de múlikti zańdastyrdy degen aıyppen oǵan 2009 jylǵy sáýirde halyqaralyq izdeý jarııalanǵan edi. Tergeýdiń paıymynsha, ol 2005-2009 jyldary BTA Banktiń korporatıvtik bıznesi №6 basqarma bastyǵynyń orynbasary bolyp turǵanynda, Ábilázovtiń uıymdasqan qylmystyq tobyna táýeldi Qazaqstan Respýblıkasynyń rezıdentteri bolatyn zańdy tulǵalardy jáne offshorlyq kompanııalardy qurýmen, olarǵa basshy, quryltaıshy bolatyn adamdardy izdeýmen aınalysqan.
Qashqyn Z.Júnisova bıylǵy jylǵy 23 shildede Vengrııada qolǵa tústi. Jaqyn arada bul eldiń ýákiletti organdary ony Qazaqstanǵa ekstradısııalaý máselesin qaraıtyn bolady.
Qurysh NURYMBET.
