Qyzyljar óńirinde turǵyn úı-kommýnaldyq sharýashylyǵyn jańǵyrtý baǵdarlamasyna qatysýǵa tilek bildirýshiler qatary jyl sanap kóbeıip keledi. Úkimet tarapynan osynaý mańyzdy joba qabyldanǵaly oblys ortalyǵynda júzden astam nysan jóndeýden ótti.
Qyzyljar óńirinde turǵyn úı-kommýnaldyq sharýashylyǵyn jańǵyrtý baǵdarlamasyna qatysýǵa tilek bildirýshiler qatary jyl sanap kóbeıip keledi. Úkimet tarapynan osynaý mańyzdy joba qabyldanǵaly oblys ortalyǵynda júzden astam nysan jóndeýden ótti.Bıyl 90-nan astam ótinish túsip, 60-y oń sheshim tapty. Baǵdarlamanyń tıimdiligin talmaı túsindirip júrgen páter ıeleri kooperatıvi qaýymdastyǵynyń jetekshisi Sergeı Hýdıakovtyń aıtýynsha, sońǵy eki jylda bul maqsatqa respýblıkalyq qazynadan 1,5 mıllıard teńge baǵyttalǵan. Turǵyndar jobalaý-smetalyq qujattamada kórsetilgen qarajattyń 3 paıyzyn jınasa, shyǵynnyń qalǵan bóligi memleket esebinen óteledi. Bıyl Petropavl qalasynda 19 kóp qabatty úıdiń shatyrlary men dálizderi qalpyna keltirilse, 110 kóp qabatty turǵyn úılerdiń tehnıkalyq zertteýine jergilikti bıýdjetten 11 mıllıon teńge bólindi.
Jobanyń artyqshylyǵyn túsinip, jóndeý jumystaryna qýana kelisken Mır kóshesi №87-shi úıdegi 97 páterdiń turǵyndary qazir ıgilikti istiń shapaǵatyn kórip otyr. Jaýyn-shashyndy kúnderi turǵyzylǵanyna jarty ǵasyrdan asqan baspananyń tóbesinen sý aǵyp, ábden yǵyr qylatyn, irgetasy da shóge túsken. Bas merdiger qyzmetin atqarǵan «Petro Bilding» seriktestigi ábden tozyǵy jetken úıdiń shatyryn qalpyna keltirip, qabyrǵalary arnaıy jylý materıaldarymen qaptaldy. Jertóledegi jylý júıeleri aýystyryldy. О́zge de jóndeý jumystary tap-tuınaqtaı atqarylyp, barlyǵy 18 mıllıon teńge jumsaldy. Munda negizinen zeınetkerler men az qamtylǵan jandardyń turatynyn eskersek, óz kúshterimen atqaryp shyǵa almaıtyny beseneden belgili edi. Merdiger uıym qurylys sapasyna kemi úsh jyl kepildik berse, turǵyndar jeńildetilgen nesıeni 15 jylǵa ózara bólip tóleıtin bolady.
2011-2020 jyldarǵa arnalǵan turǵyn úı-kommýnaldyq sharýashylyǵyn jańǵyrtý jobasynyń sharty jeńil ári qoljetimdi ekenin Ida Leonteva basqaratyn «Shýhov 1 jáne 3» páter ıeleri kooperatıvi de jete baǵalaǵan syńaıly. Árqaısysy 119 páterden turatyn eki úıdiń shyǵyndary 50 mıllıon teńgeni qurap, shatyrlar, qasbetter, dálizder jańartyldy. Bir sózben aıtqanda, búgingi zaman talabyna saı nysanǵa aınalyp, kórkeıip shyǵa keldi.
Az qamtylǵan jandar baǵdarlamanyń artyqshylyǵyn qýattaýmen qatar memleket tarapynan kórsetilgen turǵyn úı kómegine de dán rıza. Máselen, PIK tóraıymy Ida Gerbertovnanyń jalpy turǵyn alańy 47,4 sharshy metr bolatyn páterine 110 myń teńge eseptelip, onyń 40 myń teńgesi turǵyn úı kómegi esebinen ótelgen. Mundaı mysaldardy kóptep keltirýge bolady.
О́mir ESQALI,
«Egemen Qazaqstan».
Soltústik Qazaqstan oblysy.
