Brıtanııanyń Daily Mail basylymy Qazaqstannyń soltústik óńirinen tabylǵan belgisiz pentagrammanyń ne ekenin túsinbeı bas qatyrýda. Bul týraly «Nur Astana» gazeti jazady.
«Bul orasan pentagramma Qazaqstannyń álemnen tys qalǵan bóliginde beınelengen. Sýret Google Earth-te paıda bola sala, ártúrli teorııa aıtqandar tabyldy. Dıametri 366 metr bolatyn bes juldyzdy sımvol memlekettiń soltústiginde, Tobyl ózeniniń joǵarǵy saǵasynda ornalasqan. Ádette pentagrammalar ibilistiń qarǵysymen baılanystyrylady, sondaı-aq, Bahaı dininde, qytaılyq Daosızmde, neopagandyqtarda, tipti grek matematıgi Pıfagorda kezdesedi. Mundaı belginiń jan balasy aıaq baspaǵan jerde ornalasýy túsiniksiz», – deıdi Daily Mail basylymy.
Bireýler muny belgisiz shaıtanı uıymnyń qoltańbasy bolýy múmkin dese, ekinshileri Reseıdiń qupııa bazasynyń orny degendi aıtady. Vashıngton shtatynyń turǵyny Kýrt IeıtsLive Science-tyń ýeb-saıtynda sýret týraly óziniń oıyn jazypty: «Bul zenıttik basqarý zymyranyn qoldaný úshin paıdalanylǵan aımaq sekildi. Men ushqysh bolyp qyzmet atqarǵandyqtan mundaı belgiler jaqsy tanys. Reseıdiń (Keńes úkimetiniń) áýe qorǵanys qyzmeti bulardy paıdalanýy múmkin (nemese áli paıdalanady). Dóńgelek radardyń qanshalyqty durys jumys istep turǵanyn anyqtaý úshin kerek. Belginiń kólemin jáne Baıqońyr ǵarysh aılaǵynyń jaqyn ekenin eskersek, «Soıýz» ǵarysh kemesin basqarý úshin qoldanylǵan sekildi».
Beımálim tańbanyń shaıtanı uıymmen baılanysty deıtinderdiń dáleli – sýretti Googlemap-tan taýyp, ınternetke salǵan eki qoldanýshynyń nıgi «Adam» jáne «Lucifer» bolýy. Eki esim de ibilistiń atymen birge júredi. Hrıstıan dininde pentagramma bes sezim men Isanyń bes deńgeıin bildiredi. Shaıtannan qorǵaıdy degen túsinik te bar. Qalaı degenmen, bul tańbanyń Tobyl ózeniniń boıyna qaıdan kelgeni túsiniksiz. Degenmen, túbegeıli qorytyndy aldaǵy ýaqyttyń enshisine qalyp otyr.
Baqytbek Keneshuly.
