Kásipkerlerdi qoldaý maqsatynda qurylǵan jedel shtabqa kúni búginge deıin bıznes sýbektilerinen 11 myńǵa jýyq suraq kelip tústi. Kún tártibinde turǵan ózekti máselelerdiń birqataryna atameken.kz saıty arqyly jaýap berilgen.
Shyńǵys Temirdiń túsindirýinshe, kásipkerler palatanyń resmı resýrsy nemese Call-ortalyqtyń 1432 qysqa nómiri arqyly sarapshylarǵa suraq joldaı alady. «Bizge kelgen suraqtardyń basym bóligi tótenshe jaǵdaı kezinde bıznes nysandardy jalǵa berý men jalǵa alýǵa qatysty boldy. Osy másele boıynsha habarlasqandardyń 86%-yn – mıkro, 12%-yn – orta, 2%-yn – iri bıznes ókilderi qurady. Jalpy alǵanda bulardyń 62%-y – qyzmet kórsetý, 22%-y – saýda, 15%-y – óndiris salasynda jumys isteıini belgili boldy.
Onyń sózinshe, «Atameken» ulttyq kásipkerler palatasy tótenshe jaǵdaı kezinde bıznes nysandardy jalǵa berý men jalǵa alý máselesin sheshý úshin arnaıy jumys tobyn qurylyp, máseleni medıasııa arqyly sheshýdi usynǵan.
«Memlekettiń menshigindegi nysandardy jalǵa berý men alý úderisinde másele oń sheshildi. Sebebi memlekettik komıssııanyń otyrysynda Prezıdent ákimdikterge 20 naýryzdan bastap ShOB-qa memleket menshigindegi nysandardy 3 aı aqysyz berýdi, ıaǵnı kásipkerlerdi jalǵa alý aqysyn tóleýden bosatýdy tapsyrdy. Bul jeńildikke ıe bolý úshin memlekettik múlik jáne jekeshelendirý komıtetiniń www.gosreestr.kz saıty arqyly elektrondy qoltańbamen osyǵan deıingi jalǵa alý shartyna ózgeris engizý úshin qosymsha kelisimshartqa otyrý qajet. Qosymsha kelisimshart kásipkerge jaldaý aqysyn 3 aı tólemeý quqyǵyn beredi», – dedi Shyńǵys Temir.
Onyń pikirinshe, jalǵa berýshi shyǵynǵa ushyraıtyn jaǵdaıda jumys isteýge tıisti emes. Jalǵa alýshy da japa shekpeýi kerek.
«Barlyq bıznes sýbktisine teń múmkindik berilip, birdeı jaǵdaı jasalady. Biz jalǵa berýshilerden bızneske kómek berýdi suraımyz. Eger jalǵa berýshilerge bank tarapynan másele týyndap jatsa, biz bankke birge baryp, máseleni sheshýge tyrysamyz. Eger salyq organymen másele týyndasa, mamandarymyz kómek kórsetýge ázir. Eń tómengi eńbekaqyny rásimdeýge atsalysýǵa da daıynbyz!» – dep qorytty sózin departament dırektory.
