Naýryzdyń 31-inen beri Batys Qazaqstan oblysynda kúsheıtilgen karantın rejimi engizilgen bolatyn. Búginde oblys aımaǵynda karantınge baılanysty 90-ǵa jýyq blok-post qoıyldy. Bul beketterdiń altaýy – Aqjaıyq aýdany aýmaǵynda.
Oral-Atyraý tas jolynyń boıynda Shabdarjap aýylynyń tusyndaǵy jáne Jaıyq ózeniniń sol jaq betinde Sarytoǵaı aýylynyń tusyndaǵy beketter búginde syrqat sany 22-ge jetken Atyraý oblysymen shekaraǵa qoıylǵan. Aıta keteıik, qazir Oral qalasyndaǵy juqpaly aýrýlar aýrýhanasynda jatqan qos naýqastyń biri qaýipti vırýsty dál osy Atyraýǵa barǵan issaparynda juqtyrǵany anyqtalǵan edi. Budan bólek, Chapaev aýylyndaǵy qalqymaly kópirde, aýdan ortalyǵynan Qaztalov pen Jańaqala baǵytyna shyǵatyn tas joldar tusynda, Alǵabas aýylynyń burylysynda da blok-posttar tur.
Bul beketterdiń árqaısysynda 2 brıgada aýysymmen qyzmet atqarady. Atyraý shekarasynda 4 sanıtarlyq dáriger jáne 6 mıgrasııalyq, ýchaskelik, patrýldik polısııa ınspektorlary kezekshilikte tur. Blok-posttaǵy qyzmetkerler patrýldik avtokólikpen, qarý-jaraqpen, betperdemen, avtokólikti tirkeýge arnalǵan jýrnalmen, anketa paraqtarymen jáne basqa da qajetti qural-jabdyqtarymen (teplovızer, antıseptıktermen) qamtylǵan. Beketterdiń aldynda tıisti jol belgileri qoıylǵan.
Osy beket ornatylǵaly Shabdarjap aýyly tusyndaǵy blok-posttan barlyǵy 5176 avtokólik ótken eken. Onyń 2733-i – jeńil kólik, 95-i – jolaýshy tasymaldaýshy, 2318-i – júk kóligi. Kólikten bólek 13845 adam tekseristen ótken. Sońǵy táýlik ishinde Oral-Atyraý kúre jolyndaǵy Shabdarjap beketinen 285 mashına ótken. Orta eseppen alǵanda atalǵan tas joldan 250-ge jýyq avtokólik júrip ótedi eken.
- Aqparattyq jumystardyń arqasynda eki oblys arasynda jeńil kólik sany aıtarlyqtaı azaıdy. Beketten ótken barlyq azamattyń qyzýy tekserilip, saýalnama toltyryp jatyr, - deıdi Aqjaıyq aýdandyq polısııa bóliminiń bastyǵy Ertas Bısenov.
Oblys ákimi Ǵalı Esqalıev turǵyndar tarapynan shekaradaǵy bekette kólik keptelisi jıi bolady degen shaǵym túskenin aıtty. Polısııa qyzmetkerleriniń aıtýynsha, keptelis Atyraý oblysyndaǵy munaı kompanııalarynda aýysymmen jumys isteıtin adamdardyń top bolyp kelgen kezinde bolǵan eken. Eki oblys shekarasynan ótetin adamdardyń kóbi Aqtóbe oblysynyń turǵyndary kórinedi.
- Barlyq tekserýden keıin olardy patrýldik avtokólikpen oblys aýmaǵynan shyǵaryp salamyz. Bizde beketti aınalyp ótý áreketi de anyqtaldy. Búginde tártip buzýshy ustalyp, hattama toltyrdy. Al beketten óter sátinde dene qyzýy kóterilgen nemese basqa da syrqat belgisi anyqtalǵan tulǵa bolsa, biz shuǵyl túrde jedel járdem shaqyramyz, - deıdi polısııa qyzmetkerleri.
Kezdesý barysynda óńir basshysy polısııa jáne tótensha jaǵdaı qyzmetkerleri júrgizip jatqan jumystyń mańyzdylyǵyna toqtalyp, tekserý kezinde barynsha muqııat bolý qajettigin aıtty.
- Naqty saýalnama júrgizý, jazylǵan málimetterdiń tolyqtyǵyn qadaǵalaý arqasynda oblys aýmaǵynda syrqattanǵandardy anyqtaý jeńil bolady. Sonyń nátıjesinde biz aýrý juqtyrǵan adamnyń oblysqa qaıdan kelgenin anyqtap, onymen baılanysta bolǵan adamdardy tez tabamyz. Turǵyndarǵa túsindirme jumysyn muqııat júrgizip, olardyń saýalnama toltyrý kezinde jeke jaýapkershiligi týraly eskertýdiń mańyzy zor. Men sizderden oblys turǵyndaryn koronavırýs indetinen qorǵaý jolynda shydamdylyq tanytýǵa shaqyramyn, - dedi oblys ákimi blokpostaǵy qyzmetkerler brıgadasyna.
Sýretti túsirgen Meıirbek TÁJQURAN
Batys Qazaqstan
