Oblystyń bas memlekettik sanıtar dárigeri Muhamǵalı Aryspaev 15 sáýir kúni tańerteń «16 sáýirden bastap oblysta karantındik sharalar odan ári kúsheıtiletinin, Oral qalasyndaǵy barlyq qoǵamdyq kólik – avtobýstar qozǵalysy toqtap, barlyq bank bólimderi, Qazposhta bólimsheleri jumysyn ýaqytsha toqtatatyn aıtqan bolatyn. Osy habardan keıin azyq-túlikti kóterme satatyn saýda oryndarynda, bank bólimshelerinde halyq kóp jınalyp, kezek paıda bolǵan.
Oblystyq jedel shtabtyń otyrysynan keıin karantın sharalarynyń ózgerisi naqtylandy: ekinshi deńgeıli bank uıymdary qyzmetin jalǵastyratyn boldy. 17 sáýirden bastap olardyń qyzmet kórsetý ýaqyty 9.00.-16.00. saǵat aralyǵynda bolady.
-Halyqqa tólenetin barlyq áleýmettik kómek, járdemaqylar, zeınetaqylar tolyǵymen tólenedi, zańdy tulǵalarǵa nesıe alý, t.b. qyzmet jasala beredi, tek jeke adamdarǵa nesıe berý ýaqytsha toqtatylady. Al azyq-túlik ónimderin satatyn bazarlar 18-sáýirden bastap ýaqytsha jabylady, - dedi Muhtar Mankeev.
16-24 sáýir aralyǵynda turǵyndar men jeke kólikterdiń qozǵalysy shekteledi. Qoǵamdyq kólik bir aptaǵa toqtaıdy. Kúsheıtilgen karantın rejiminde júrip-turýǵa ruqsat berilgen adamdardyń tizimi www.stopcovid.kz saıtyna tirkeledi. Kúsheıtilgen karantın rejiminde jumysyn isteı beretin kásiporyndar men mekemelerde qyzmet etetin turǵyndardyń jumysyna baryp-kelýin jumys berýshi uıymdastyratyn boldy.
-Qala aýmaǵynda ornalasqan barlyq blok-bekette aýyl sharýashylyǵy salasyndaǵy kásipkerlerdiń, kóktemgi egispen aınalysatyn sharýalardyń tizimi bar, olardyń júrip-turýyna kedergi bolmaıdy. Kez kelgen másele boıynsha bizdiń jedel shtab jaýap berýge ázir, - dedi Oral qalasynyń ákimi Abat Shynybekov.
Sondaı-aq medısınalyq mekemelerdiń, dárihanalardyń, kommýnaldyq mekemelerdiń, naýbaıhanalardyń, t.b. kúndelikti tirshilikti qamtamasyz etetin mekeme-uıymdardyń jumysy jalǵasa beredi.
Batys Qazaqstan
