Baıqaýǵa bilim berý uıymdarynyń 16 men 29 jas aralyǵyndaǵy oqýshylary, kolledj stýdentteri qatysqan. Shyǵarma arqaýy el gazetiniń ǵasyrlyq toıyna jáne Abaı Qunanbaıulynyń 175 jyldyǵyna arnalǵan erkin taqyryptaǵy maqalalar saıysy 15 sáýirde qorytyndylandy.
- Baıqaýǵa barlyǵy 30-ǵa jýyq shyǵarma kelip tústi. Bul jumystardy tájirıbeli tilshilerden quralǵan qazylar alqasy talqylady, - deıdi basqarmanyń bólim meńgerýshisi Zámzágúl Ǵabbasova.
Sonymen, baıqaý qorytyndysy boıynsha Oral qalasyndaǵy №19 orta mekteptiń 11 synyp oqýshysy Beksultan Serikov I orynǵa ıe boldy. Júldeli ekinshi oryndy Qaztalov aýdanyndaǵy Birik orta mektebiniń 11 synyp oqýshysy Aıajan Ǵappar men Syrym aýdanyndaǵy Qadyr Myrza Álı atyndaǵy orta mektebiniń 11 synyp oqýshysy Dilnaz Súleımenova ózara bólisti. Úsh úshinshi oryn Oral qalasyndaǵy №38 mektep-lıseıiniń 11 synyp oqýshysy Aınaz Esekeshke, Qaratóbe aýdany Baqytjan Qarataev atyndaǵy Saraljyn orta mektebiniń 9 synyp oqýshysy Gúlmaıra Erǵojınaǵa, Jańaqala aýdany mektep-gımnazııasynyń 10 synyp oqýshysy Nurdana Jaqsybaevaǵa buıyrdy.
Baıqaý jeńimpazdary dıplomdarmen, ózge qatysýshylar sertıfıkatpen marapattaldy. Onlaın ótken baıqaýdyń júldeleri óz ıelerine poshta arqyly jetkiziledi.
- Karantın ýaqytyna qaramastan oqýshylaryn baptap, daıyndap, jaýapty baıqaýǵa qatystyrǵan ustazdarynyń, jetekshileriniń eńbegi zor ǵoı. Baıqaý júldegerleriniń jetekshileri G.Nurǵalı, N.Májekerova, A.Sársenǵalıeva, L.Qusaıynova, T.Ashyqova, A.Esqarına syndy muǵalimderge de alǵys aıtamyz, - deıdi Zámzágúl Ǵabbasova.
Batys Qazaqstan
