Batys Qazaqstan oblystyq Sybaılas jemqorlyqqa qarsy qyzmeti uıymdastyrǵan bul basqosýdyń paıdasy kóp boldy. Konferensııaǵa Almaty qalasynan onlaın qatysqan Qaıyrjan Ahmetbekuly óz sózinde sybaılas jemqorlyqqa qarsy monıtorıng júrgizý jáne sybaılas jemqorlyqqa qarsy standarttardy qabyldaý, óz mekemelerinde sybaılas jemqorlyq táýekelderine ishki taldaý júrgizý jáne sybaılas jemqorlyq qylmystary úshin jeke jaýapkershilik máselelerine keńinen toqtalyp ótti.
Mektep pen sybaılas jemqorlyq uǵymy sınonım bolmasa da, qoǵamnyń bul dertinen bilim salasy da saý bolmaı tur. Máselen, 2019 jyly jáne bıylǵy birinshi toqsanda Batys Qazaqstan oblysynyń bilim salasynda sybaılas jemqorlyq jáne laýazymdyq 8 qylmys tirkelgen. 4 adamǵa qarsy qylmystyq tekserý júrgizilip, úsheýi sottaldy. Bulardyń ekeýi – kolledj qyzmetkeri, bireýi – mektep dırektory, bireýi – aýdandyq bilim bóliminiń meńgerýshisi. Solardyń biri – Terekti aýdany Podstepnoe aýyly №1 mektebiniń dırektory Qaımoldınov muǵalimdi qyzmetke ornalastyrý úshin 300 myń teńge para alyp, ustaldy. Terekti aýdandyq sotynyń sheshimimen paraqor basshy 9 mln teńge aıyppul tólep, ómir boıy memlekttik qyzmetke turý quqyǵynan aıyryldy.
Onlaın konferensııaǵa qatysqan Batys Qazaqstan oblystyq Sybaılas jemqorlyqqa qyrsy qyzmet basshysynyń birinshi orynbasary Nurdáýlet Samet pen Oral qalalyq bilim berý bólimi basshysynyń orynbasary Batıqa Paıdına da óz sózinde oqý oryndarynda sybaılas jemqorlyq quqyq buzýshylyqtar jasaýǵa yqpal etetin sebepter men jaǵdaılar týraly aıtyp ótti.
Shara barysynda PUBLICBUDGET.KZ saıtyndaǵy «Ashyq bıýdjetterdiń ınteraktıvti kartasy» jobasy týraly aıtyldy. Sybaılas jemqorlyqqa qarsy is-qımyl agenttigi ázirlegen bul saıt aqparatqa qol jetkizýdi jeńildetip, bılik pen azamattyq qoǵam arasynda tikeleı baılanys arnasyn qurý úshin qurylǵan biregeı joba bolatyn.
- Osy kartada oblystyń bilim berý, qurylys, áleýmettik nysandardy jóndeý jáne saqtaýǵa bólingen bıýdjet qarajaty týraly egjeı-tegjeıli málimet bar. Kartaǵa memlekettik kásiporyndar, medısınalyq mekemeler, bilim berý nysandary, joldar, ıaǵnı bıýdjet qarajaty bólingen kez kelgen ınfraqurylymdyq nysan engizilgen. Kez kelgen adam qajetti nysandy basyp, óz eskertýin qaldyra alady. Máselen, bir azamat jóndeý sapasyna, bilim sapasyna rıza bolmasa, bizben birlesip jumys isteýge, qoǵamdyq baqylaý júrgizýge jáne quqyq buzýshylyqtar týraly dereý habarlaýǵa shaqyramyn, - dedi Nurdáýlet Samet.
Batys Qazaqstan
