«Qurmetti bórlilikter!
Memleket basshysy Qasym-Jomart Kemeluly Toqaev Qazaqstan halqyna arnalǵan óz málimdemesinde Tótenshe jaǵdaı rejımi 11 mamyrǵa deıin uzartylǵandyǵyn jáne atalǵan jaǵdaıǵa baılanysty memleket tarapynan qoldaýlar, kómekter áli de jalǵasatynyn atap ótti. Sondyqtan, jerlesterimdi 11 mamyrǵa deıin tótenshe jaǵdaı rejıminiń talaptaryn qatań saqtaýǵa shaqyramyn. О́ıtkeni, bul adam densaýlyǵyna óte qaýipti indet, muny búkil álem moıyndap otyr.
Qazirgi kúrdeli kezeńde memleket tarapynan kórsetilip jatqan kómekter men qoldaýlarǵa bórlilikter de ıe bolýda. Tabysynan aıyrylǵan azamattardyń ótinishteri boıynsha 11 myńnan asa jerlesterimizge 42500 teńge kóleminde kómek kórsetildi. Kommýnaldyq qyzmet úshin tólenetin 15000 teńge kólemindegi tólem alýǵa arnaıy qurylǵan call-ortalyqqa 1000-ǵa jýyq ótinish túsip otyr. Uly Otan soǵysyndaǵy Jeńistiń 75 jyldyǵyna oraı, barlyq soǵys jáne tyl ardagerlerine tólemder ýaqytyly tólendi.
Qınalǵandarǵa qol ushyn sozǵan volonterlerdiń jáne jeke kásipkerlerdiń kómegimen 400-ge jýyq muqtaj otbasylarǵa azyq-túlikpen, basqa da qajetti zattarmen (otyn, turmystyq, sharýashylyq zattar) kómekter kórsetildi.
Memleket basshysy tótenshe jaǵdaılar kezinde kóktemgi egis naýqanyna eshqandaı kedergi bolmaýyn mindettegen bolatyn. Bul másele de óz sheshimin taýyp, 41 sharýa qojalyqtary egis dalasynda jumystaryna kiristi.
Jumysshylardy qysqartpaý jáne eńbekaqy kólemin azaıtpaý maqsatynda ári el ekonomıkasy úshin mańyzdy Qarashyǵanaq ken ornyndaǵy kompanııalar barlyq sanıtarlyq talaptardy saqtaı otyryp, jumystaryn jalǵastyrýda.
Aldaǵy ýaqyttaǵy bizdiń mindetimiz – qaýipsizdik sharalaryn saqtap, indettiń jańa oshaqtarynyń paıda bolýyna jol bermeý. Ol úshin memlekettik organdar, medısına, quqyq qorǵaý, shekara bekitiniń qyzmetkerleri barynsha qyzmet etip, shekaradan ótken, ózge óńirlerden kelgen nemese qandaı da bir aýrý belgisi baıqalǵan azamattardy qatań baqylaýǵa alyp, tıisti sharalar qabyldaýda. Bizdiń turǵyndarymyz da, sonyń ishinde Atyraý óńirindegi ken oryndarynan jumystan kelgen jerlesterimiz vırýsqa jeńil-jelpi qaramaı, karantın talaptaryn qatań saqtap, jaýapkershilikti sezinse eken deımin.
«Men úshin ár azamattyń ómirinen qymbat eshteńe joq», - degen Memleket basshysynyń sózin taǵy da qaıtalaǵym keledi. Bul qıyndyqty da jeńemiz, eń bastysy – birligimiz bekem bolsyn!
El basyna kún týǵanda qaýip-qaterge qaramaı, aldyńǵy qatarda qyzmet kórsetip júrgen dárigerlerimizge, polısııa qyzmetkerlerine, shekarashylarymyzǵa, qalanyń tazalyǵy men zalalsyzdandyrý jumystaryn júrgizgen mamandarymyzǵa, óz qaýipsizdigin oılamaı, muqtaj jandarǵa qol ushyn sozǵan volonterlerimiz ben jomart jandarǵa, barlyq aqparatty turǵyndarǵa der kezinde ári shynaıy jetkizip otyrǵan jergilikti buqaralyq aqparat quraldary ókilderine jáne tótenshe jaǵdaı rejıminde qabyldanǵan naqty sharalardy merziminde ári asa jaýapkershilikpen júzege asyrǵan áriptesterime, túsinistik tanytyp, talaptardy oryndap, qoldaý bildirgen barsha turǵyndarymyzǵa alǵysymdy bildiremin. Aspanymyz ashyq, elimiz, jurtymyz aman bolsyn»,- dep jazdy ol Facebook paraqshasynda.
