–Jumys oryndarynyń keminde 50 paıyzy jumyspen qamtý ortalyqtarynyń joldamalary arqyly jumyssyzdarǵa usynylýy tıis. Osy maqsatta bıyl «Jumyspen qamtýdyń 2020-2021 jyldarǵa arnalǵan jol kartasy» memlekettik baǵdarlamasynyń aıasynda 35 mlrd 308 mln teńge bólindi, dedi osyǵan oraı arnaıy keńes ótkizgen oblys ákimi Mahambet Dosmuhambetov.
Máselen, atalǵan baǵdarlamany iske asyrý barysynda tek Atyraý qalasynda 17 ınfraqurylymdyq joba iske qosylady. Nátıjesinde 2028 jumys orny ashylady. Onyń 1043-in jumyspen qamtý ortalyǵy arqyly jumyssyzdarǵa usyný kózdelipti.
–Tótenshe jaǵdaı kezindegi karantın rejımine baılanysty merdiger mekemeler óz jumystaryna endi kirisedi. Kózdelgen qarajattyń jalpy kóleminiń keminde 90 paıyzyn otandyq óndirýshilerden taýar satyp alýǵa jumsaýdy josparlap otyrmyz, - dedi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Serik Qamıdolla.
Oblys ákimi Mahambet Dosmuhambetovtiń pikirinshe, «Jumyspen qamtýdyń 2020-2021 jyldarǵa arnalǵan jol kartasy» memlekettik baǵdarlamasy aıasynda júzege asýy tıis jumystardy óz deńgeıinde uıymdastyra almaı otyrǵandar bar. Endi turaqty jumys ornyn ashyp, bólingen qarajatty maqsatty jáne ýaqytyly ıgerý qajet.
–Basty maqsat – aımaqtaǵy jumyssyzdyq deńgeıiniń ósýine jol bermeý. Qosymsha jumys oryndaryn ashyp, olardy barynsha turaqty jumys oryndaryna aınaldyrý arqyly ár otbasynyń tabys kózin qamtamasyz etý kerek, - dedi oblys ákimi Mahambet Dosmuhambetov.
