Aldaǵy qazan aıynyń 8-9-y kúnderi Astanadaǵy Táýelsizdik saraıynda VIII Eýrazııalyq KAZENERGY forýmy ótedi.
Aldaǵy qazan aıynyń 8-9-y kúnderi Astanadaǵy Táýelsizdik saraıynda VIII Eýrazııalyq KAZENERGY forýmy ótedi.
Osyǵan oraı, «KAZENERGY» qaýymdastyǵy tóraǵasynyń orynbasary J.Sársenov, qaýymdastyqtyń bas dırektory Á.Maǵaýov, oryndaýshy dırektory T.Qojalıeva, qarjylyq-ekonomıkalyq taldaý departamentiniń dırektory N.Janekenov baspasóz máslıhatyn ótkizdi. Forýmda J.Sársenov jańa energetıkalyq júıeni qalyptastyrý, qaterler men tyń múmkindikter, sondaı-aq turaqty energetıkalyq keleshekti qamtamasyz etýdegi Eýrazııa aımaǵynyń róli talqylanatynyn aıtty. Energetıkalyq samıttiń negizgi spıkerleri arasynda Premer-Mınıstr Serik Ahmetovpen birge, Fransııanyń, Ispanııanyń burynǵy premer-mınıstrleri, Úndistannyń, Birikken Arab Ámirlikteriniń osy salaǵa jaýapty mınıstrleri, sondaı-aq taǵy birqatar halyqaralyq uıymdar men kompanııalardyń jetekshileri bolady.
Forýmnyń alǵashqy kúniniń resmı bólimi «Jańa energetıkalyq júıeni qalyptastyrý: negizgi oılar, qaterler men tyń múmkindikter» atty jalpy otyryspen ashylady. Birinshi kúni úsh dóńgelek ústel ótkiziledi. Shara aıasynda, halyqaralyq energetıkalyq forýmmen birge «Bolashaqtyń qýaty – tıimdi sheshimder izdeý» jáne «Dástúrli energetıka – dáýirdiń túgesiler tusy ma, álde salanyń túrlenýi me?» dep atalatyn paneldi seksııalar jumysy josparlanǵan.
Munymen qatar, forýmda tuńǵysh ret Áıelder energetıkalyq klýbynyń «Energetıkany turaqty damytýdaǵy áıelderdiń róli» atty otyrys uıymdastyrylady. Atalǵan is-shara munaı-gaz jáne energetıka salasyndaǵy áleýmettik-ekonomıkalyq, quqyqtyq, genderlik jáne ózge de máselelerdi talqylap, tıimdi sheshimin izdeýde názik jandy kompanııa basshylary, memlekettik organ ókilderi, halyqaralyq jáne qoǵamdyq uıymdarǵa jetekshilik etetin áıelderdi biriktirýge, sondaı-aq bolashaqtyń qýatyndaǵy áıelderdiń rólin anyqtaýǵa baǵyttalǵan.
Al, KAZENERGY jastar forýmy aıasynda ıntellektýaldyq «Zerek» oıynyn, «Bolashaqtyń qýaty: qaterler men jańa múmkindikter» atty «EXPO-2017» ınteraktıvti pikirsaıysyn, «KAZENERGY» bilim berý baǵdarlamasy shákirtaqy ıegerleriniń sleti men Munaı jáne gaz mınıstriniń «Jastarmen dıalog – kásibılik aspektileri» sheberlik dárisin ótkizý kózdelgen. Jalpy, eki kúndik forýmda basqa da kóptegen sharalar uıymdastyrylady.
Nurbaı ELMURATOV,
«Egemen Qazaqstan».
