17 maýsymnan bastap barlyq mektepke deıingi uıymdarǵa qujat qabyldaýdy bastaý josparlanýda. e.astana.kz nemese indigo24.kz elektrondy júıesinde mektepke deıingi uıymdarda (jekemenshik balabaqshalar men shaǵyn ortalyqtar) bosaǵan 20 198 oryn jarııalanatyn bolady (2019 jyly – 15 myń oryn bosady), dep habarlady búgin Nur-Sultan qalasynyń bilim basqarmasy.
Bosaǵan oryndardyń ishinde 2018 jyly týǵandarǵa – 2 442 oryn, 2017 jyly týǵandarǵa – 7 877 oryn, 2016 jyly týǵandarǵa – 5 449 oryn, 2015 jyly týǵandarǵa – 4 430 oryn qarastyrylǵan.
"1 maýsymnan barlyq memlekettik mektepke deıingi uıymdarda saǵat 8.00-den 18.00-ge deıin ata-analar úshin onlaın-konsýltasııalar uıymdastyryldy. Qajet bolsa ata-analar qatań sanıtarlyq-dezınfeksııalyq sharalardy saqtaı otyryp, memlekettik mektepke deıingi uıymdar janyndaǵy konsýltasııalyq pýnktterdiń kómegine júgine alady", – dedi basqarmada.
Toptastyrýdy ótkizý kestesi men joldamalardy alý boıynsha aqparat barlyq ınternet resýrstarda: Bilim basqarmasynyń saıtynda, ákimdiktiń saıtynda, elektrondyq júıede ornalastyrylady.
"Elordadaǵy karantındik sharalar rejımine baılanysty berilgen joldamalardyń merzimi ata-ananyń qatysýysyz avtomatty túrde júıede uzartylatyn bolady. Barlyq týyndaıtyn suraqtar boıynsha Call-ortalyqqa 55-68-83, 55-68-73, 1445 telefondary arqyly habarlasýǵa bolady", – delingen bilim basqarmasynyń habarlamasynda.
