Eń aldymen, Lázzat Rysymbekqyzy dári-dármek týraly qala turǵyndary arasynda azdap dúrligý bolyp otyrǵanyn alǵa tartyp, osy jaǵdaı jóninde pikirin bildirdi.
"Búginde qalamyzda JRVI, pnevmonııa jáne tumaýdyń basqa da túrlerimen aýyrǵandar sany kóbeıýde. Osy sebepti halyq reseptsiz bosatylǵan dárilerdi jappaı satyp alýda. Bul durys emes. Dárilerdiń merzimi men saqtaý joldary bar. Eger ol durys saqtalmasa, adam aǵzasyna keri áser etedi. Sondyqtan dárilerdi, meılinshe, dárigerdiń nusqaýlyǵymen satyp alý kerek. Osy rette qalamyzda dári tapshylyǵy týraly shaǵym túspegenin, alaıda dárihanalarda dárilerdiń tez taýsylyp jatqany týraly aqparattar kelgenin aıta keteıin. Iаǵnı qoımalarda dáriler bar, biraq dárihanalarǵa jetken soń, tez taýsylyp qalýda", dedi departament basshysynyń orynbasary.
Onyń aıtýynsha, qalada 730-daı dárihana bar. Onyń 60%-y úlken, qalǵany – kishi dárihanalar. Kishi dárihanalarda dárilerdiń qory az bolady. Al úlken kompanııalardyń dári-dármek qory jetkilikti. Qazirgi tańda biz 77 dáriniń túrine monıtorıng júrgizdik. Sonyń ishinde 240 myń qaptamada (ýpakovka) parasetamol bar ekenine kóz jetkizdik. Sondaı-aq dárigerdiń nusqaýynsyz beriletin ózge de dárilerdiń jetkilikti bolyp shyqty.
Budan bólek, L.Qashqynbaeva dárihanalardaǵy baǵanyń ósip ketpeýine monıtorıng júrgizetindikterin alǵa tartty. Onyń aıtýynsha, 2019 jyly QR Densaýlyq saqtaý mınıstrliginiń 104-buıryǵymen 6191 dárilik zattardyń túrine shekteýli baǵalar kórsetilgen. Eger dárihana ıeleri osy shekteýdi eskermeı, dárilerdiń baǵasyn negizsiz kóteretin bolsa úlken dárihanalarǵa 100 AEK, al kishi dárihanalarǵa 70 AEK mólsherinde aıyppul salynatynyn eskertti.
