"Koronavırýs indetiniń beleń alýyna jáne demalýshylardyń azamattyq jaýapkershiliginiń tómendigine baılanysty Aqmola oblysynyń týrıstik aımaqtary 24 shilde kúni saǵat 00:00-den 3 tamyz kúni saǵat 00:00-ge deıin jabylady", delingen Aqmola oblysynyń týrızm basqarmasynyń Instagram-daǵy habarlamasynda.
Týrıstik aımaqtardyń perımetri boıynsha kirý kezinde blokbeket ornatylady jáne avtokólik qozǵalysy shekteledi. Buryn kelgen týrıster qonaq úıler men sanatorııalyq-kýrorttyq nysandarda qalady. Demalys aımaǵynda júrgen adamdar betperdeni taǵyp júrýdi jáne áleýmettik qashyqtyq erejesin saqtaýy qajet. Endi qonaq úılerdi brondaýǵa, ótinimderdi qabyldaýǵa tyıym salynady.
Memlekettik tapsyrys boıynsha jumys isteıtin sanatorııalyq-kýrorttyq obektiler kúsheıtilgen sanıtarlyq-dezınfeksııalyq rejimdi saqtaı otyryp, jumysyn jalǵastyrady.
Jalǵa alynǵan jaǵajaılar, saýnalar, qonaq úıler janyndaǵy basseınder qyzmetine tyıym salynady. Sondaı-aq, sý aıdyndarynyń mańynda ornalasqan oıyn-saýyq jáne saýda núkteleriniń, qaıyq stansalarynyń jumysy toqtatyldy.
"Shekteý sharalary únemi erekshe baqylaýda bolady. Koronavırýspen kúresý úshin oblys jáne aımaq turǵyndary jaǵdaıǵa túsinistikpen qarap, demalys jáne kópshilik jınalatyn oryndarǵa barýdan bas tartý kerek", delingen habarlamada.
