Búgin qala ákimdiginde ótken brıfıngte, Nur-Sultan qalasynyń Qalalyq orta sapasy jáne baqylaý basqarmasy basshysynyń orynbasary m.a. Erlan Berdalın koronavırýs ınfeksııasynyń aldyn-alý sharalary kezeńindegi eńbek qyzmetiniń erekshelikteri týraly aıtty.
"Jaldamaly qyzmetkerler úshin 42500 teńge mólsherindegi áleýmettik járdemaqy tóleýge ótinishti jumys berýshiler óz betinshe beredi. Árıne, bul qyzmeti bas sanıtarlyq dárigerdiń shekteý sharalaryna túsken uıymdar. Aıta ketý kerek, bul tólemder áleýmettik saqtandyrý qorynan qarastyrylǵan, ıaǵnı jumys berýshiler bul úshin eshqandaı qarjy tólemeıdi", – dedi E. Berdalın.
Aldaǵy jumystarǵa tıisti baqylaý jasaý maqsatynda Nur-Sultan qalasy ákimdigimen quramyna múddeli memlekettik organdardyń qyzmetkerleri kirgen shtab quryldy.
"Árıne, eńbek qatynastary bóliginde konstıtýsııalyq quqyqtardyń buzylýyna baılanysty barlyq máselelerdi eńbek ınspeksııasy qaraıdy. Kún saıyn eńbek ınspeksııasyna 20-dan 40-qa deıin adam keledi. Bul máselelerdiń kópshiligi jumys berýshilermen túsindirý barysyndaǵy áńgimelesýden keıin oń sheshimin tabady. Olaı bolmaǵan jaǵdaıda qyzmetker sotqa júginedi", – dedi E.Berdalın.
Eńbek quqyqtarynyń buzylýyna tap bolǵan azamattar Dostyq kóshesi, 13 úıde ornalasqan Nur-Sultan qalasynyń orta sapasy jáne baqylaý basqarmasyna júginýge quqyly.
"Joǵaryda aıtylǵandardy qorytyndylaı kele, jumys berýshilerge bul jaǵdaı el úshin ońaı emes ekenin, sondyqtan aqysyz demalystaǵy jumysshylardyń tizimin berý máselesine asa jaýapkershilikpen qaraýyn suraımyz", – dep túıindedi E.Berdalın.
