Medısınalyq jáne veterınarlyq zerthanalar álem boıynsha teń dárejeli mártebege ıe. Sondyqtan Veterınarlyq medısına jáne medısına salasyndaǵy halyqaralyq uıymdar, sonyń ishinde HEB, FAO jáne DDSU pandemııa kezinde koronavırýs ınfeksııasymen kúreste veterınarlyq zerthanalardy paıdalanýdy usynady.
Osyǵan oraı elimizde PTR testileý múmkindigin keńeıtý úshin Densaýlyq saqtaý mınıstrligine 1 tamyzdan bastap Qazaqstannyń 11 aımaǵynda ornalasqan 24 veterınarlyq zerthanalardyń mamandandyrylǵan ǵımarattary qoldanysqa usynylady.
Paıdalanýǵa beriletin barlyq test oryndary zerthanalardyń ekinshi qabattarynda ornalasady. Mıkroorganızmderdiń patogendiligi II-IV toptarymen jumys isteý talaptaryna sáıkes keledi: olardyń jeke kireberisteri, sanıtarlyq qaqpalary jáne bıologııalyq qaýipsizdik jáshikteri bar. Bul veterınarlyq zerthanalardyń birinshi qabattarynda negizgi baǵyttar boıynsha óz jumystary jalǵasa beredi.
Sonymen qatar, shalǵaıdaǵy aýyldyq jerlerde dıagnostıkalyq zertteýler júrgizý úshin jyljymaly veterınarlyq zerthana qoldanylady.
Ǵımarat jáne jyljymaly zerthanamen birge PTR jabdyqtarynyń 26 jıyntyǵy beriledi dep josparlanýda. Sondaı-aq, Aýyl sharýashylyǵy mınıstrligi Respýblıkalyq veterınarlyq zerthanadan jáne Ulttyq agrarlyq ǵylymı-bilim berý ortalyǵynan adamdar men janýarlarǵa qaýipti ınfeksııalar dıagnozyn anyqtaý tájirıbesi bar 67 bilikti mamandy issaparǵa jiberedi.
Bir aıta keterligi, janýarlardyń juqpaly aýrýlaryn dıagnostıkalaýdyń PTR ádisi is júzinde koronavırýstyq ınfeksııany PTR dıagnostıkalaý ádisimen uqsas. Jalǵyz aıyrmashylyq qoldanylatyn test júıelerinde. Sondyqtan álemniń kóptegen jetekshi elderi COVID-19 pandemııasymen kúresýde veterınarlyq zerthanalardyń múmkindigin paıdalanýda.
Esterińizge sala keteıik, osy jyldyń 21 shildesinde ótken QR Úkimetiniń otyrysynda Densaýlyq saqtaý mınıstri Alekseı Soı Qazaqstanda PTR testileý qýattylyǵynyń jetispeýi kúnine 8 myń synaqtan turatynyn málimdedi. О́ńirlerdegi jaǵdaıdy retteý úshin vedomstvo basshysy respýblıkanyń veterınarlyq qyzmet zerthanalarynyń múmkindikterin paıdalanýdy usynǵan bolatyn.
