Bıyl jolshylar "Aqtóbe – Atyraý – RF shekarasy (Astrahan)" avtomobıl jolynyń 339 shaqyrymynda qozǵalysty ashýdy josparlap otyr. Jol ýchaskelerindegi jumystardy oryndaý qarqyndylyǵyn QR IIDM Avtomobıl joldary komıteti tóraǵasynyń orynbasary Tólegen Abdýllın tekserip qaıtty.
Joldyń jalpy uzyndyǵy 897 shaqyrymdy quraıdy. Búgingi tańda qaıta jańartý jumystarymen joldyń 359 shaqyrymy qamtylǵan. Joba birneshe ýchaskelerge bólingen. Olardyń barlyǵynda qurylys jumystary belsendi túrde júrgizilip jatyr.
Osylaısha uzyndyǵy 299 shaqyrymdy quraıtyn "Qandyaǵash – Maqat" jolyndaǵy jumystardy "Todini Construzioni Generali S.p.A", "Qurylys-ónerkásiptik ınvestısııalyq korporasııasy" AAQ" BK, "Shanghai Construction Group Co., Ltd", Ant Insaat Maden Sanayi A.S." kompanııalary jáne "Aq jol qurylys" JShS júrgizýde.
Aqtóbe oblysyndaǵy jol ýchaskesinde merdiger kompanııalar bıyl qıyrshyq tasty-mastıkalyq asfalt-betonnan jasalǵan jabyndynyń joǵarǵy qabatyn joldyń 20 shaqyrymynda, jabyndynyń tómengi qabatyn joldyń 32 shaqyrymynda tósedi. Atyraý oblysynda jolshylar jyl basynan beri joldyń 35 shaqyrymynda jabyndynyń tómengi qabatyn, 37 shaqyrymynda jol negiziniń joǵarǵy qabatyn jaılastyrǵan. Dál osy "Qandyaǵash – Maqat" joly qozǵalys úshin bıyl ashylmaq.
Sondaı-aq, jumystar joldyń 100-160 shaqyrymdarynyń aralyǵynda júrgizilip jatyr. Merdiger uıym "Uniserv" JShS jyl basynan joldyń 8 shaqyrymynda jol negiziniń joǵarǵy qabatyn, taǵy 8 shaqyrymynda jabyndynyń tómengi qabatyn tósedi. 60 shaqyrymdyq jol ýchaskesiniń tolyq boıynda qozǵalys 2021 jyly ashylady dep josparlanýda.
Qaıta jańartý jumystary júrgizilip jatqan jol ýchaskelerin aralaǵan Komıtet tóraǵasynyń orynbasary qurylys jumystaryn ýaqytyly ári sapaly oryndaýǵa qatysty naqty tapsyrmalar berdi.
