Almatyda M.Maqataev kóshesindegi medısınalyq mekeme provızorlyq ortalyq retinde jumys jasaýda

Medısına • 30 Shilde, 2020

Almatyda M.Maqataev kóshesindegi medısınalyq mekeme provızorlyq ortalyqqa aınaldy

Osydan eki-úsh apta buryn ortalyqqa kúnine 20-25 naýqas túsken bolsa, qazir orta eseppen 8-10 adam túsýde. Bul týraly onlaın-brıfıng kezinde Psıhıkalyq saýyqtyrý ortalyǵynyń dırektory Sapar Rahmensheev málimdedi, dep habarlaıdy Egemen.kz

Aıym DÁÝIT

– Psıhıkalyq saýyqtyrý ortalyǵynyń M.Maqataev kóshesindegi fılıalynda 5 naýryzdan bastap provızorlyq ortalyq qyzmet jasap keledi. Shetelden ushyp kelgen 1800 azamattyń barlyǵy osy ortalyqta boldy. Onyń 152-nen ınfeksııa anyqtalyp, olardy juqpaly aýrýlar aýrýhanasyna aýystyryp otyrdyq. Birinshi shildeden bastap bizdiń ortalyqta 350 tósek provızorlyq tósek jasaldy. Iаǵnı M.Maqataev kóshesindegi ortalyqta 180 tósek bolsa, Á.Kekilbaev kóshesinde 170 tósek provızorlyq kómek kórsetilip jatyr, – dedi spıker.

Provızorlyq ortalyqta bilikti 296 medısına qyzmetkeri jumys jasaıdy.

Olar ókpeniń qabynýynyń ortasha aýyr jáne aýyr dárejesimen, ıaǵnı pnevmonııamen aýyratyn naýqastarǵa barlyq qajetti emdeý sharalaryn júrgizýde.

– О́kpesi qabynǵan naýqastarǵa sapaly medısınalyq kómek kórsetiledi. Naýqastarǵa qabynýǵa qarsy, bakterııaǵa qarsy, sondaı-aq antıkoogýlıantti terapııa jáne oksıgenoterapııa qoldanylady. Bul emniń bári Densaýlyq saqtaý mınıstrliginiń bekitken protokoly boıynsha júrgizilýde. Bizdiń ortalyqta 10 reanımasııalyq tósek jáne 6 IVL apparaty bar. Jyl sońyna deıin taǵy 4 IVL apparatyn alamyz dep josparlap otyrmyz, – dedi ortalyq basshysy.

Osy aıdyń basynan atalǵan provızorlyq ortalyqtan 499 adam em alyp, jazylyp shyqqan. Eń este qalatyny, 1933 jyly týylǵan ájeı ókpesiniń 64 paıyzynyń qabynǵan dıagnozymen túsip, emdelip shyqqan.

– 1933 jyly týylǵan apamyz bizdiń aýrýhanaǵa túsip, 18 kún jatyp, em qabyldady. Bes kún reanımasııada jatty. KT rentgeninen qaraǵanda ókpesiniń 64 paıyzy qabynǵany anyqtaldy. Ol kisige protokol boıynsha em júrgizilip, on segiz kúnniń ishinde saýyǵyp shyqty, – deıdi Sapar Rahmensheev.

Aıta ketsek, provızorlyq ortalyq ashylǵaly beri jasy 55-ten joǵary 207 naýqas emdelgen. Onyń 152-si jazylyp shyqsa, qalǵandary em qabyldaýda. Búgingi málimetke qarasaq, Maqataev kóshesindegi provızorlyq ortalyqta 103 adam emdelýde, al Á.Kekilbaev kóshesindegi ortalyqta 125 naýqas em alýda. Iаǵnı burynǵydaı emes naýqastar sany azaıǵan ári bos oryndar da bar.

Dırektordyń aıtýynsha pandemııaǵa qaramastan ortalyq óziniń tikeleı mindetterin toqtatqan joq. Iаǵnı dıspanserlik baqylaýda turǵan psıhıkalyq ıa bolmasa narkologııalyq aýytqýlary bar aýrýlardy ambýlatorlyq jáne ortalyqqa jatqyzyp emdeý júrgizilýde. Psıhologııalyq kómek kórsetý de toqtatylǵan joq.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz