Búgin Atyraýǵa "Joldastyq" qazaq mádenıeti" qoǵamy keńesiniń tóraǵasy Nurlan Qandyqov pen "Qazaq mádenıetin damytý" qorynyń basqarma tóraǵasy Edýard Ysqaqovtyń bastamasymen jınalǵan 1 tonnadan astam gýmanıtarlyq kómek keldi.
Atyraýdaǵy belsendi volonter Nazgúl Nájikenovanyń aıtýyna qaraǵanda, buǵan deıin shekaranyń arǵy shebinde turatyn qandastarymyz munaıly óńirdegi aýrýhanamen baılanys jasapty. Maqsat – eń qat medıkamentter tizimin alý.
"Búgin oblystyq kardıologııalyq ortalyqqa Reseıdiń Astrahan oblysynan jiberilgen 20 000 medısınalyq betperde, 500 lıtr dezınfeksııalyq suıyqtyq, 1000 ınfýzıondyq sıstema, 1000 medısınalyq dáke, 300 qorǵanysh kostıým, túrli medıkamentterdi tapsyrdyq. Kórshi eldegi qandastarymyzdyń bastamasyna Astrahan oblysynyń gýbernatory Igor Babýshkın qoldaý kórsetti. Osynaý ıgilikti iske Astrahanda turatyn cheshen qoǵamdastyǵynyń músheleri de atsalysty", dedi Nazgúl Nájikenova.
