Elorda • 10 Tamyz, 2020

Elordada tórt jańa dene shynyqtyrý-saýyqtyrý kesheni salynady

Elordada búgingi tańda úsh sport nysanynda jóndeý júrgizilýde, sondaı-aq eki jańa nysannyń qurylysy júrýde. Bul týraly brıfıng barysynda Nur-Sultan qalasynyń dene shynyqtyrý jáne sport basqarmasy basshysynyń orynbasary Narıman Elamanov aıtty. Bul týraly ákimdiktiń resmı saıty habarlaıdy, dep jazady Egemen.kz

Aıym DÁÝIT

"Jumyspen qamtýdyń jol kartasy aıasynda "Tolqyn" sport kesheniniń shatyryna kúrdeli jóndeý júrgizildi. Búgingi tańda ǵımaratta jóndeý jumystary júrgizilýde: aqtaý, qabyrǵalardy tegisteý, ǵımarat ishin, kıim aýystyratyn oryndardy qaıta syrlaý», – dedi Elamanov.

Sondaı-aq onyń aıtýynsha, "Qazaqstan" sport saraıy boıynsha "Nur-Sultan qalasyndaǵy "Qazaqstan" sport saraıyn zııatkerlik tehnologııalardy qoldana otyryp jańǵyrtý jáne paıdalanýǵa berý" jobasy pysyqtalýda. "Astana Arena" stadıonynda fýtbol alańyn aýystyrý jáne kıim aýystyrý, kirý toptaryn jóndeý júrgizilýde.

Sonymen qatar qalada IAAF (Halyqaralyq jeńil atletıka federasııalarynyń qaýymdastyǵy) talaptaryna tolyq sáıkes jabyq úı-jaılarda halyqaralyq jáne respýblıkalyq jarystardy ótkizýge arnalǵan jeńil atletıkalyq sport kesheniniń qurylysy aıaqtalýda. Nysan álem chempıonattary men jazǵy Olımpıada oıyndaryn qosa alǵanda, sportshylardy halyqaralyq jarystarǵa daıarlaý úshin qazirgi zamanǵy joǵary tehnologııalyq baza bolady.

"Qazanat" ıppodromynyń aýmaǵynda ıppoterapııa ádisimen múmkindigi shekteýli balalardy ońaltý úshin at sporty keshenin salý jáne paıdalanýǵa berý boıynsha jumystar júrgizilýde. Nysan 250 adamǵa arnalǵan, 600 oryndyq trıbýnalary bar. Bul joba MJÁ sheńberinde jeke qarjylyq bastama boıynsha iske asyrylýda.

Búgingi tańda Nur-Sultanda 30-dan astam iri sport nysany jumys isteıdi, onyń 18-i memlekettik, 12-si jeke menshik.

"Memleket basshysynyń "100 DSK" salý tapsyrmasy boıynsha, halyqty buqaralyq sportpen qamtý úshin Ilınka, Kóktal 2, О́ndiris, Jeleznodorojnyı turǵyn alaptarynda tórt dene shynyqtyrý-saýyqtyrý kesheniniń qurylysy josparlanǵan. Qazirgi ýaqytta úsh dene shynyqtyrý-saýyqtyrý kesheniniń qurylysy júrip jatyr", dep atap ótti Elamanov.

Qalalyq dene shynyqtyrý jáne sport basqarmasy basshysynyń málimetinshe, elordada velojoldardyń uzyndyǵy artyp keledi. Josparlanǵan 123 km joldyń 70 km-i salynǵan. 2020 jyly – 46,4 km, 2021 jyly – 36 km, 2022 jyly – 40,7 km velojol salý josparlanýda.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz