Nur-Sultan qalasynyń turǵyndary jyl saıyn demalyp, densaýlyqtaryn qalpyna keltirý úshin jazdy asyǵa kútedi. Jahan jurtyn ábigerge salǵan indettiń áli basylar túri joq. Soǵan qaramastan elorda turǵyndary densaýlyqtaryna jiti mán berip, ımmýndyq belsendilikti arttyrý úshin arnaıy shıpajaı nemese demalys keshenderine barýdy jalǵastyrýda.
Qala mańyndaǵy iri demalys oryndaryna Balqaragai, Green Park, Zolotoı fazan, Aısha syndy keshender kiredi. Máselen, Balqaragai demalys aımaǵynda syıymdylyǵy 30 adamǵa deıin jaıly bóreneli kottedjde ornalasa alasyz. Demalys kesheni elordanyń aq qaıyńdy jasyl beldeýinde, qoldan jasalǵan ormanda ornalasqan.
Al Qosshy kentinde, Nura ózeniniń boıynda ornalasqan qala syrtyndaǵy Green Park aýmaǵynda jazǵy kúrkeler, kıiz úıler, ıppodrom jáne tipti shaǵyn haıýanattar baǵy da bar. Solardyń ishinde «Zolotoı fazan» týraly aýyz toltyryp aıtý úshin atalǵan keshenniń basshysy Darhan Serikbaıulymen tildesken edik.
– Biz demalys ornymyzdy otbasylyq kóńil kóterý aýmaǵy retinde damyta otyryp, aýmaq kólemin barynsha úlkeıtýge tyrystyq. Asfaltti jáne ormandy, dalaly soqpaq joldarmen serýendeýdi usyna alamyz. Demalys aımaǵy 800-den astam gektardy qamtıdy. Bul – oqshaýlanýǵa óte jaqsy oryn. Sondaı-aq qonaqtarymyzdyń 100 metrge deıin araqashyqtyq saqtaýyn qamtamasyz etemiz. Demalýǵa arnalǵan kóptegen jeke alań, jazǵy meıramhana, kúrke (besedka), balyq aýlaýǵa arnalǵan pırs, terrasa, kóldiń qasynda ornalasqan kottedj nemese kúmbezdi úıshikter men kıiz úıler bar. Qylqan japyraqty ormanda serýendeýge arnalǵan soqpaqtar da bar, – deıdi D.Serikbaıuly.
Sondaı-aq «Zolotoı fazan» kesheni kúnshyǵys eliniń orman terapııasyn tıimdi emdeý ádisterine almastyryp otyr. Máselen, tabıǵı terapııa ádisi. Bul – ónerkásiptik qalanyń shýynan alystatyp, emosııalyq jaılylyq beretin, tabıǵı dybystarǵa baǵyttalǵan. Kelesi ǵylymı týrızm ádisi – kólderde uıa salatyn qustardyń (jabaıy qazdar, tyrnalar, aqqýlar, úırekter men ondatrlar jáne t.b.) ómirin zertteýge arnalǵan tabıǵattaǵy jumys. Osy arqyly ata-analar balalaryna ormanda serýendeý kezinde turmystyq ómir súrý jaǵdaılaryn úıretedi.
Atalǵan demalys orny aıtýly is-sharalar ótkizetin alań retinde qyzmet kórsetedi. Solardyń qatarynda, buǵan deıin qala ákimdiginiń «Jastar saıasaty» bóliminiń bastamasymen elorda jastaryna arnalǵan koých-trenıngter uıymdastyratyn.
– Jyl saıyn Aqmola oblysynan balalardy jazǵy lagerge alyp baramyz. Oblystyq ákimdik pen «Howard Roark» seriktestigimen birlese otyryp, jazǵy balalar lagerin uıymdastyramyz. Birinshi karantın merzimi aıaqtalǵannan keıin naýqas balalarǵa kómek kórsetý, qaıyrymdylyq saparlary men janýarlarmen tanystyrý úrdisin qolǵa aldyq, – deıdi «Zolotoı fazan» JShS basshysy.
Budan bólek, kelýshilerdi qabyldaıtyn barlyq obektilerde sanıtarlyq-epıdemııalyq normalar negizindegi talaptar qadaǵalanyp otyrady. Qonaqtarǵa qatań túrde betperdeler, antıseptıkterdi qoldaný mindettelgen. Demalys ornynda jıi zalalsyzdandyrý jumystary júrgiziledi.
