Qazirgi qazaq rýhanııatynyń qabyrǵaly ókili, esimi elge áıgili kıno jáne teatr rejısseri, Qalıbek Qýanyshbaev atyndaǵy akademııalyq dramteatrdyń kórkemdik jetekshisi Talǵat Temenov Memleketaralyq «Dostastyq juldyzdary» syılyǵynyń laýreaty atanypty.
TMD elderiniń Gýmanıtarlyq yntymaqtastyq keńesi tarapynan taǵaıyndalǵan bul mártebeli marapat ǵylym jáne bilim, mádenıet pen óner salasynda ónimdi eńbek etip, tolaıym tabystarǵa qol jetkizgen aıtýly tulǵalarǵa beriledi.
«Mosfılm», «Qazaqfılm» kınostýdııalarynda kópshilik kózaıymyna aınalǵan kórkem fılmder túsirip, respýblıka teatrlarynyń sahnasynda súbeli spektaklder qoıǵan sańlaq rejısserimizdiń kezekti qýanyshqa kenelýi shynymen súısinerlik jaǵdaı. Sondyqtan osynaý oqıǵaǵa oraı kórnekti óner qaıratkerine qutty bolsyn aıta otyryp, kórermenderin aldaǵy ýaqyttarda da kóńil kónshiter kórkemdik álemine jeteleı berýine tilektestik bildiremiz.
