Qazalyda jaqynda ǵana jańa ǵımaratqa kóshken qalalyq kitaphanada Soworking ortalyǵy ashyldy. Ashylý saltanatyna aýdan ákimi Murat Ergeshbaev arnaıy qatysyp, ortalyqtyń jumysymen tanysty. Munan soń kitaphana qyzmekterleri Qazaqstan jastarynyń jalyndy jetekshisi Ǵanı Muratbaev oqyǵan №16 mekteptiń tarıhy týraly aıtyp berip, jerlesimiz jaıly jazylǵan shyǵarmalarmen tanystyrdy.
– "Sıfrly Qazaqstan" jobasy aıasyndaǵy bul ıgi is oqyrmandar qataryn kóbeıtýge ózindik yqpalyn tıgizeri anyq. Zaman talabyna saı, álemdegi damyǵan elderdiń kitaphanasynda usynylatyn qyzmet túrin qazaq qoǵamyna engizýdiń ózi – jańarý men jańǵyrýǵa bastaǵan úlken qadamnyń biri. Sebebi, kitaphanalar tek kitap oqıtyn oryn emes, túrli semınarlar, trenıngter, dárister ótetin, jastar jıi bas qosatyn naǵyz bilim ortalyǵy bolýy tıis, – degen Murat Nálhojauly kitaphana qyzmetkerlerine sáttilik tiledi.
Kitaphanashylardyń aıtýynsha, Soworking ortalyǵy jastar men jasóspirimderge kóp múmkindik beredi. Bul jerde qala jastary kóptegen qyzyqty aksııalarǵa, zııatkerlik oıyndarǵa jáne taǵy basqa sharalarǵa qatysa alady. Sonymen qatar ortalyqta shahmat, doıby, toǵyzqumalaq oınaıtyn oryndar da bar.
