Bıaǵamyz: «Daýdyń basy – Daırabaıdyń kók sıyry», degeli kóp ótse de, el ishinde daý-damaıdyń azaıar túri joq. «Qaıdan kelesiń, sottan kelemin, sot emes-aý, ottan kelemniń» mysaly da órship tur. O zaman da, bu zaman, aqyn Abaı atyndaǵy aýyldaǵy daýdyń basy – óleń bolady dep kim oılaǵan?!. «Estimegen elde kóp» deımiz be, álde «qazaqta talaı qyzyq bar» deımiz be? Áıteýir, á degende ezý tartqyzar osy jáıttiń ar jaǵynan eldiń rýhanı turǵydan azyp-tozbaýy jónindegi ózekti máseleni ózek qylyp, oıǵa shomsańyz, kúlýdiń ornyna kúrsinip te qalarsyz.
Jaqsylyq qarııa osydan biraz ýaqyt buryn «Alaıaq qýlar aýylda bar...»
Bıaǵamyz: «Daýdyń basy – Daırabaıdyń kók sıyry», degeli kóp ótse de, el ishinde daý-damaıdyń azaıar túri joq. «Qaıdan kelesiń, sottan kelemin, sot emes-aý, ottan kelemniń» mysaly da órship tur. O zaman da, bu zaman, aqyn Abaı atyndaǵy aýyldaǵy daýdyń basy – óleń bolady dep kim oılaǵan?!. «Estimegen elde kóp» deımiz be, álde «qazaqta talaı qyzyq bar» deımiz be? Áıteýir, á degende ezý tartqyzar osy jáıttiń ar jaǵynan eldiń rýhanı turǵydan azyp-tozbaýy jónindegi ózekti máseleni ózek qylyp, oıǵa shomsańyz, kúlýdiń ornyna kúrsinip te qalarsyz.
Jaqsylyq qarııa osydan biraz ýaqyt buryn «Alaıaq qýlar aýylda bar...» degen óleń jazady. Terme úlgisindegi týyndysynda ol aýylyndaǵy dúmshe moldalardyń astamshylyqtaryn «qamshyǵa» alady. Sóıtip, kisisi qaza bolǵan úı ıelerinen janaza men quran oqyǵandary úshin aqsha alýdy «bızneske» aınaldyrǵan moldalardy aqylǵa shaqyrmaq bolypty. Biraq óleńnen ózderiniń bet-beınesin tanyǵandar «ar-namysymyz ben qadir-qasıetimizge nuqsan keltirip, bedelimizdi túsiretin mazaq óleńinen bizdiń árqaısymyzǵa kelgen moraldyq zalal kólemin 1 000 000 (bir mıllıon) teńgege baǵalaımyz» dep, Jaqsylyq aqyndy sotqa bergen. «Izdegenge – suraǵan» degendeı, sýdıa Zapparova aryz ıeleriniń hatyndaǵy 1 mıllıon teńge týraly talapty qanaǵattandyrmasa da, aqıqatty aıtqan aqynjandy qarııadan aryzdanýshynyń árqaısysynyń paıdasyna 30 myń teńge tóleýi kerek ekeni jóninde úkim shyǵarǵan.
Al aýdannyń bas ımamy Aıat Almahanov bolsa aqyn jaǵynda. Ol: «Abaı aýylyndaǵy Amantaı Tilepbergenov degen kisi ózinshe top quryp, ózderin ózderi molda saılap, kisisi baqılyq bolǵan úıdegi janazada ádepsizdik jasapty. Osy topty tártipke shaqyrýdy aýyl turǵyndary ótingen soń, atalǵan aýyldaǵy meshitte jınalys ótkizdim. Jınalǵan jurtqa meshitke moldany taǵaıyndaý Qazaqstan musylmandary dinı basqarmasynyń quzyrynda ekenin, dinı bilimi joq kim kóringen molda bola almaıtynyn aıtyp túsindirdim. О́kinishke qaraı, Tilepbergenov Amantaıdyń toby bul jınalysqa kelmedi», deıdi.
– Maqul ǵoı, ózin-ózi ımammyn dep «jarııalaǵannan» keıin asyl dinimizdegi keshirimshildikti, aýyzbirshilikti, adamgershilikti ýaǵyzdaýy kerek emes pe? Kebisin laqtyryp, bala-shaǵanyń kó-zinshe beıádep sózderdi burqyratatyn mundaı «ımamdar» ımandylyq jaıly qalaı nasıhat aıtady? Men ózimdi aqynmyn dep eseptemeımin. Álgi syqaqty jazýyma aýyl turǵyndarynyń suranysy túrtki boldy. Sonda aty-jónin kórsetpeı óleń jazyp, syn aıtqan adamdardyń bárine sot aıyppul tóletip, aıaqqa jyǵyp berip jatsa, qoǵamdaǵy kesirler men kesapattar qalaı túzeledi? «Bas kespek bolsa da, til kespek joq», degen babalar ósıeti adyra qalǵany ma? Bárinen de aýyl aqsaqaldary jastarǵa ımandylyq úıretsin dep aýylymyzǵa meshit salyp bergen adamdardan uıat boldy. О́zderinshe top quryp, ortasynan ımam saılap alǵandardyń serkesi oıyna kelgenin qashanǵy isteıdi? – dep sottalǵan «aqyn» jáne otyr.
Kósemáli SÁTTIBAIULY,
«Egemen Qazaqstan».
Jambyl oblysy,
Shý aýdany,
Abaı aýyly..
