Qabyldanǵan sharalardyń oń nátıjesi
– Karantındik is-sharalar arqyly búginge deıin Almatyda vırýs juqtyrǵan balalar sany 2,5-3%-dan aspady. Áleýmettik qashyqtyqtyń jáne gıgıenalyq sharalardyń saqtalmaýy, balalar arasynda ınfeksııa men aýrýdyń kúrt ósýine ákeletinin bárimiz jaqsy túsinemiz. Sonymen qatar maýsymdyq JRVI-diń órshýi múmkin, bul COVID-19 vırýsymen birge aýrýdyń aǵymyn qıyndatady jáne aýyr asqynýlarǵa ákelýi yqtımal.
Ártúrli jastaǵy balalarǵa erekshe nazar aýdarý kerek, óıtkeni olar aýrý taratýda úlken ról atqarady. Patogenniń COVID-19 kontagıozy joǵary, sondyqtan vırýs juqtyrǵan balalar ózderiniń jaǵdaıynyń aýyrlyǵyna jáne aýrýdyń klınıkalyq kórinisine baılanysty úıde oqshaýlanýy nemese aýrýhanaǵa jatýy tıis, – deıdi «Balalar qalalyq klınıkalyq juqpaly aýrýlar aýrýhanasy» ShJQ MKK bas dárigerdiń emdeý isi jónindegi orynbasary Jumagúl Eshibekova.
Megapolıste pandemııa kezinde qabyldanǵan sharalar nátıjesin berdi. Sońǵy jańalyqtyń biri, Perınatologııa jáne balalar kardıohırýrgııasy ortalyǵynan COVID-19-dan saýyqqan sońǵy naýqas shyǵaryldy
«Keshe biz eki jaqty pnevmonııamen aýyratyn sońǵy naýqasty shyǵardyq. Naýqastyń jaǵdaıy jaqsy, bizdiń dárigerlerge óte rıza. Endi ortalyqtaǵy juqpaly aýrý-provızorlyq bólimshesin kardıohırýrgııalyq bólimshege josparly emdeýge jatqyzýdyń qaıta jandanýyna baılanysty jaýyp tastadyq», deıdi ortalyq dırektory Ǵanı Bodyqov.
Atalǵan ortalyqta 118 naýqas emdeldi, 48 bala qabyldandy, júkti áıelderge 20 kesarev tiligi jasaldy. Eń bastysy, naýqastar arasynda koronavırýstan ólim jaǵdaıy tirkelgen joq.
Tumaýǵa jıi shaldyǵatyndar kimder?
Qalada COVID-19 vırýsy azaıǵanyna qaramastan, densaýlyq saqtaý júıesiniń barlyq deńgeıinde aýqymdy jumys jalǵasyp jatyr. Bıylǵy 10 qyrkúıekte Almatyda tumaýǵa qarsy ekpe júrgizý bastalady. Tumaýǵa qarsy tegin ekpeni 400 myńnan astam almatylyq alady. Degenmen, mamandar kúzde COVID-19 vırýsynyń ósý yqtımaldyǵyn joqqa shyǵarmaıdy.
«Kúzde sozylmaly maýsymdyq aýrýlardyń kúsheıetin ýaqyty, adamdar JRVI jáne tumaýmen jıi aýyra bastaıdy. Ádette, adamnyń ımmýnıteti tómendeıdi jáne kez kelgen ınfeksııaǵa qarsy tura almaıdy, sonyń ishinde COVID-19 vırýsymen tez aýyryp qalýy yqtımal. Sondyqtan tumaý ınfeksııasynan senimdi qorǵanys sharalarymen qorǵaný óte mańyzdy», deıdi №4 qalalyq emhananyń bas dárigeri Zýhra Ýmarova.
Qazir emhanalarǵa tirkelgen turǵyndar arasynda sanaq júrgizilip, táýekel tobyna jatatyndardyń sanaty anyqtaldy. Osylaısha, qalanyń 400 myńnan astam turǵyny tumaýǵa qarsy tegin ekpe alady. Olardyń ishinde 65 jastan asqan adamdar sany – 264 myń, sozylmaly aýrýy barlar – 125 myń, 22 myń bala, 9 myń medısına qyzmetkeri, 7 myńnan astam júkti áıel bar. Osyǵan baılanysty tumaýratýǵa beıim turǵyndar arasynda tegin vaksınalaýdyń aýqymdy qalalyq baǵdarlamasy bastaldy.
Emhanalarda adamdar kóbeımeýi úshin vaksınalaý ázirlengen kestege sáıkes 30 qarashaǵa deıin júrgiziledi. Bul sharany 1500 medısına qyzmetkeri bar 370 egý brıgadasy atqarady.
«Táýekel tobyndaǵylardan» týberkýlezdi anyqtaıdy
Sonymen qatar qyrkúıek aıynda 1-synyp oqýshylary arasynda týberkýlezge qarsy revaksınasııa júrgiziledi. Prosedýra kúndizgi ýaqytta mektepterdiń egý kabınetterinde júrgiziledi. Mundaı tájirıbe karantındik sharalar engizilgenge deıin qoldanyldy.
Ýchaskelik dárigerler 1 qyrkúıekke deıin Mantý synamasy boıynsha tekseriletin 1-synyp oqýshylarynyń tizimin jasaǵan bolatyn. 4 qyrkúıekten bastap balalardy ata-analarymen mektepke Mantý synamasy men BSJ revaksınasııasyna shaqyra bastady.
«Bizdiń №11 qalalyq emhana Jetisý aýdanynyń 6 mektebine qyzmet kórsetedi. Barlyq synypta sabaq kestesi ártúrli bolǵandyqtan, sol sabaq kestesine baılanysty quryldy jáne oqýshylardyń basym kópshiligi qashyqtan oqıdy. 6 mektep boıynsha 800-ge jýyq 1-synyp oqýshylaryn qamtýdy josparlap otyrmyz. Bıyl ata-analar joǵary belsendilik tanytyp otyr. Epıdemııalyq jaǵdaıǵa baılanysty bas tartqan jaǵdaılar da kezdesti», deıdi №11 qalalyq emhananyń bas dárigerdiń emdeý-profılaktıkalyq jumystar jónindegi orynbasary Almash Ardabaeva.
ALMATY
