Qazaqstan • 11 Qyrkúıek, 2020

Jýrnalısterge beıbit mıtıngilerde jumys isteý tártibi bekitildi

2718 ret kórsetildi

Aqparat jáne qoǵamdyq damý mınıstrligi jýrnalısterdiń beıbit mıtıngilerde jumys isteý erejelerin bekitti, dep habarlaıdy Egemen.kz

Jýrnalısterge beıbit mıtıngilerde jumys isteý tártibi bekitildi

2020 jylǵy 28 tamyzda Aqparat jáne qoǵamdyq damý mınıstriniń 2020 jylǵy 14 tamyzdaǵy № 279 "Beıbit jınalystarda bolatyn jýrnalıst (buqaralyq aqparat quraly ókili) qyzmetiniń qaǵıdalaryn, jýrnalıstiń aıyrym belgileriniń nysandaryn bekitý týraly" buıryǵy qoldanysqa engizilgen.

Qaǵıdalar BAQ-tyń jergilikti atqarýshy organdarmen, uıymdastyrýshylarmen jáne qatysýshylarmen ózara is-qımyl jasaý tártibin aıqyndaıdy, atap aıtqanda, mynadaı negizgi erejeler kózdelgen:

1) jýrnalıstiń kásibı qyzmetin qamtamasyz etý (suhbat berý, brıfıngter) úshin jergilikti atqarýshy organ jýrnalısterdi BAQ úshin Jedel baspasóz ortalyǵymen qamtamasyz etý, sondaı-aq beıbit jınalys ótkizý kezinde óz ókiliniń qatysýy jóninde sharalar qabyldaıdy;

2) BAQ úshin Jedel baspasóz ortalyǵyna biryńǵaı talaptar qoıylady;

3)  aıyrym belgileriniń nysandary belgilenedi. Jedel ortalyq jáne JAO ókili Jedel baspasóz ortalyǵy eki jaǵdaıda uıymdastyrylady:

1) eger beıbit jınalysqa qatysýshylardyń boljamdy sany 200 adamnan assa;

2) jergilikti atqarýshy organǵa jiberiletin buqaralyq aqparat quraldarynyń suratýy boıynsha.

Sondaı-aq jedel baspasóz ortalyǵy myna sharttarǵa sáıkes kelýi kerek:

1) lentamen shekteý;

2) foto, beınetúsirilim jasaý jáne suhbat alý úshin jetkilikti kórinýdi qamtamasyz etý;

3) elektrmen jabdyqtaýdy qamtamasyz etý;

4) ishki ister organdary qyzmetkerleriniń ómiri men densaýlyǵyna qaýip tóngen jaǵdaıda dereý den qoıý arqyly jýrnalısterdiń qaýipsizdigin qamtamasyz etý.

Sonymen birge jýrnalısterdi Jedel baspasóz ortalyǵyna alyp barý, jýrnalısterge beıbit jınalysty uıymdastyrýshylar men qatysýshylardan suhbat, túsiniktemeler alýǵa járdemdesý, olardyń qaýipsizdigin qamtamasyz etýge baǵyttalǵan sharalardy túsindirý maqsatynda jergilikti atqarýshy organ beıbit jınalysty ótkizý kezinde óz ókiliniń qatysýyn qamtamasyz etedi.

Aıyrym belgileriniń nysandary

Jýrnalıstiń aıryqsha belgilerin kııý qajettiligi, eń aldymen, qaýipsizdikti qamtamasyz etý, sondaı-aq beıbit jınalys kezinde jýrnalısterdi sáıkestendirý maqsatynda qarastyrylǵan.

Beıbit jınalys prosesin jarııalaý úshin jýrnalıstke usynylǵan erekshe belgilerdiń kem degende bireýi (keýdeshe, jeńdegi tańǵysh, japsyrma) bolýy jetkilikti.

Bul rette jýrnalısti sáıkestendirýdiń basqa tásilderi (beıdjıkterdiń bolýy jáne t.b.) aıryqsha belgiler bolyp tabylmaıdy.

BAQ nemese jýrnalısterdiń aıryqsha belgilerimen óz betinshe qamtamasyz etiletinine nazar aýdaramyz. Aıqyn kórinetin aıyrym belgileri bar jýrnalıstiń jedel baspasóz ortalyǵynyń aýmaǵynda da, odan tys jerlerde de erkin júrip-turýǵa quqyǵy bar ekenin atap ótken jón.