Emhanada Almaty qalalyq Taýarlar men qyzmetterdiń sapasy men qaýipsizdigin baqylaý Departamentiniń basshysy, Qalanyń bas memlekettik sanıtarlyq dárigeri Jandarbek Bekshın men Almaty qalalyq Qoǵamdyq densaýlyq Basqarmasynyń basshysy Kamaljan Nadyrov maýsymdyq tumaýǵa qarsy vaksına saldyrdy.
Baspasóz konferensııasy barysynda Jandarbek Bekshın bıylǵy 15 qyrkúıekten bastap aýqymdy egý bastalǵany týraly habarlady.
"Aldaǵy maýsymda jergilikti bıýdjet qarajatyna qaýip tobyndaǵy adamdarǵa tegin vaksına egý úshin Reseıden 130 myń doza kóleminde úshvalentti tumaýǵa qarsy "Grıppol Plıýs" vaksınasy satyp alyndy.
Sondaı - aq, KVI-diń tirkelýin eskere otyryp, qosymsha 300 myń doza satyp alýǵa ótinish berildi", dedi J.Bekshın.
2019 jyly qala halqynyń 10,3 paıyzyna (200 747), onyń ishinde qaýipti topqa engen 100 000 adamǵa jergilikti bıýdjet esebinen tegin vaksına egildi, 93 633 adam jumys berýshilerdiń esebinen, 7114 - aqyly túrde jekemenshik medısınalyq ortalyqtardan vaksına ektirgen. Ekpe saldyrǵandardyń arasynda ımmýnızasııadan keıin ózderin jaısyz seziný jaǵdaılary tirkelmegen.
"Bıylǵy jyly biz vaksına saldyrýǵa jaýapkershilikpen qarap otyrmyz, sebebi koronavırýs pandemııasy kezinde aýrýlar qabattasyp ketýi múmkin. Osy jaǵdaıdy eskere otyryp, almatylyqtardy áriptesterimniń vaksına alýǵa shaqyrýyna beı-jaı qaramaı, sol arqyly pandemııa jáne maýsymdyq aýrýlar órshigen ýaqytta JRVI jáne tumaýmen aýyrýdy azaıtýǵa shaqyramyn. Satyp alynǵan vaksına burynnan beri jaqsy tanylǵan, halyq arasynda ol birinshi ret egilip jatqan joq. Vaksınanyń eshqandaı qaýpi joq", dedi Kamaljan Nadyrov.
Qalanyń epıdemıologııalyq qyzmetiniń málimetteri boıynsha, JRVI men tumaý bıylǵy jyly qarashanyń sońynan bastap 2021 jyldyń birinshi toqsanynda órshýdiń eń joǵary shegine jetedi. Aldaǵy epıdemııalyq maýsymnyń eresheligi onyń koronavırýs ınfeksııasymen qabattasý qaýpi bolýy múmkin.
