Oblys ortalyǵyndaǵy Shoqan Ýálıhanov atyndaǵy Kókshetaý memlekettik ýnıversıtetiniń túlegi Margarıta Papýshaǵa dám osy aýdannan buıyrǵan. Sebebi osy óńirge turmysqa shyqty. Alǵashqyda joǵary bilimi bolǵanymen, tájirıbesi joqtyǵy jolyn kesip, jumysqa ornalasýda qıyndyq týdy. Bilim oshaqtarynyń birinde oryn qashan bosar dep qol qýsyryp otyrýǵa taǵy bolmaıdy. Osylaı júrgende aýdan ortalyǵyndaǵy kolledjge jumysqa ornalasty. Onda da óz qurbylary tárizdi mamandarǵa jaqsylyǵy mol jastar tájirıbesi baǵdarlamasy boıynsha. Kolledj dırektory Larısa Shevsovanyń aıtýyna qaraǵanda, jas maman jumysqa degen yntasymen tanylǵan. Adamnyń alǵa umtylýy qashanda kózge kórinip turmaı ma? Tapsyrylǵan jumysty urshyqsha úıiretin isker jas jaýapkershiligimen erekshelengen. Az ýaqyttyń ishinde quqyqtyq bazany tolaıym meńgerip aldy.
Qazir jastar tájirıbesi boıynsha atalǵan oqý ornynda alty adam jumys isteıdi. Olardyń árqaısysy óz mamandyqtary boıynsha eńbek etýge qushtar.
– Alǵashqyda jumys taba almaı abdyrap qalǵanym ras, – deıdi jas maman Margarıta Papýsha, – jumyspen qamtý ortalyǵy osy kolledjge jibergen bolatyn. Múmkindikti qalt jibermeı, boıymdaǵy bar kúsh-jigerimdi, joǵary oqý ornynda alǵan bilimimdi sarqa jumsaýǵa tyrysyp kelemin.
Jas mamandarǵa sharapaty tıip otyrǵan jastar tájirıbesiniń ıgiligi aıta qalarlyqtaı. Qazir 16 adam osy ıgilikti kórip otyr. Olardyń ishinde qolynan is keletindigin dáleldegen 10 maman turaqty jumysqa ornalasqan. «Eńbek» baǵdarlamasynyń birinshi baǵyty boıynsha qysqa merzimdi kásiptik oqýǵa 11 adam baǵyttalyp otyr. Taıaý kúnderi olar da sertıfıkat alyp, óz jumystaryn bastaıdy. Bes adam qaıtarymsyz grantqa ıe bolǵan. Atalǵan baǵdarlamanyń ekinshi baǵyty boıynsha 4 adam 11 mln 500 myń teńge kóleminde nesıe alyp, óz kásipterin dóńgeletip otyr. Olardyń kóbi mal sharýashylyǵymen aınalysýda.
– 2020 jyly aýdanda «Eńbek» baǵdarlamasynyń barlyq baǵyttary tyńǵylyqty júrgizilýde. Áleýmettik jumys oryndaryna 7 adam jiberildi, qoǵamdyq jumys oryndaryna 62 adam ornalastyryldy. «Jumyspen qamtý jol kartasy 2020» baǵdarlamasy boıynsha 13 joba júzege asýda. Bir aıta keterligi, ortalyqqa ótinishpen kelgen 225 adamnyń 77 paıyzy turaqty jumysqa ornalastyryldy, – deıdi aýdandyq jumyspen qamtý ortalyǵynyń basshysy Berik Hamıtov.
Bir aıta keterligi, jastar tájirıbesine kelgen mamandar úshin baspana da qarastyrylǵan. Dıplomy bar kez kelgen jas jumyssyz qalmaıdy.
Aqmola oblysy,
Egindikól aýdany
