Onyń aıtýynsha, 1967 jyly «Shardara» sý qoımasy eń kóp degende 6 baldyq jer silkinisine tótep beretindeı qýattylyqpen salynǵan. Alaıda Ekologııa, geologııa jáne tabıǵı resýrstar mınıstrliginiń Sý resýrstary komıtetine qarasty «Qazsýshar» RMK saqtyq sharalaryn kúsheıtý úshin qumnan kóterilgen qabyrǵalardy qalyńdatyp, jer asty sýlarynyń deńgeıin tómendetý úshin «Shardara» sý qoımasyn qaıta jańǵyrtý jumystaryn qolǵa alǵan.
«1 mln 100 myń tekshe metr qum tóseledi. Osylaısha nysan qabyrǵasynyń artqy jaǵyn tolyǵymen nyǵaıtatyn bolamyz. Jer silkinisi bola qalsa, sý astyndaǵy tektonıkalyq plıtalar oınaýy múmkin. Sonda sýdyń betinde alyp tolqyndar paıda bolady. Bul jumystardyń barlyǵy sonyń aldyn alý sharasy. Arnaıy burǵylanǵan tesikterdiń sanyn kóbeıtip jatyrmyz. Bul jer asty sýlarynyń deńgeıin tómendetedi, – deıdi Ǵ.Myrzabaev.
Al Qapshaǵaı sý qoımasynyń «Shardara» sý qoımasy óndiristik bólimshesiniń basshysy Abaı Mútálıevtiń sózinshe, 2019 jyly sý nysanynyń qabyrǵalaryn nyǵaıtýǵa respýblıkalyq bıýdjetten 7 mlrd 733 mln teńge qarajat bólingen. Osylaısha 56 jyl buryn salynǵan sý qoımasyn kezeń-kezeńimen jańǵyrtý jumystary qarqyndy júzege asyrylýda. Sý qoımasynyń qurylysy 2021 jyldyń aıaǵynda tolyǵymen aıaqtalady dep josparlanyp otyr. Qazirgi tańda jańǵyrtý jumystarynyń shamamen 33 paıyzy aıaqtalyp, qurylys josparǵa sáıkes júrgizilip jatyr.
Osy ýaqytqa deıin «Shardara» sý qoımasyndaǵy uńǵymalardyń sany 183 bolatyn. Qazir bul 600-ge kóbeıtildi.
Aıta keteıik, «Shardara» sý qoımasynyń jalpy syıymdylyǵy – 5 mlrd 200 mln tekshe metr. Qazir sý nysanynda 792 mln tekshe metr sý bar. Osynyń nátıjesinde Shardara aýdany men Qyzylorda oblysynyń biraz bóliginde vegıtasııalyq kezeń sátti ótken. Jıyn-terin naýqany kezinde Shardara aýdany men Qyzylorda oblysyna 7 mlrd tekshe metr sý berilgen.
Aldaǵy ýaqytta «Shardara» sý qoımasyna sıfrly tehnologııalardy engizýdi de josparlap otyr. Qurylys jumystary aıaqtalǵannan keıin sý bólý jáne ony esepteý jumystary tolyǵymen avtomattandyrylmaq.
«Bul jerdiń barlyǵyna elektrondy esepteýish quraldary qoıylady. Bógetten shyǵyp jatqan sýdyń barlyǵy kompıýter arqyly eseptelip otyrady. Ony bizdiń mamandar baqylaıdy. Al buryn gıdrotehnıkter platınanyń barlyǵyn aralap, sýdyń deńgeıin qolmen ólsheıtin», dedi «Shardara» sý qoımasy óndiristik bólimshesiniń basshysy Abaı Mútálıev.
