"Qadirli ustazdar!
Sizderdi Nur Otan partııasy jáne óz atymnan tól merekelerińizben shyn júrekten quttyqtaımyn! Bul kún ustaz aldyn kórgen, tálim-tárbıesin alǵan barsha azamattyń júregine erekshe ystyq.
Adamzat úshin ustaz – dúnıedegi eń aıaýly da ardaqty esimderdiń biri. Memlekettiń ıdeologııasy, qoǵam qundylyqtary, ǵylym men ónerdiń asyl murasy ustazdyń tálim-tárbıesi arqyly urpaqtan-urpaqqa jol tartyp keledi.
"Adamnyń adamgershiligi jaqsy ustazdan bolady" dep uly Abaı aıtqandaı, jas urpaqty azamat etip tárbıeleýdegi úlesterińizdi aıryqsha atap ótkim keledi. Urpaq bolashaǵy, memleketimizdiń keleshegi – sizderdiń qoldaryńyzda.
Qazir elimizdegi bilim salasynda jarty mıllıonnan astam adam eńbek etýde. Bizdiń partııa músheleriniń 30% – pedagogter. Partııa ustazdardyń múddesin qorǵap, áleýmettik jaǵdaıyn jaqsarta túsý baǵytynda júıeli jumys jasap jatyr. Elbasy, Nur Otan partııasynyń Tóraǵasy Nursultan Nazarbaevtyń tapsyrmasyna sáıkes "Pedagog mártebesi týraly" zań jobasy ázirlenip, qabyldandy. Bul muǵalim mamandyǵyna degen qyzyǵýshylyqty arttyrýǵa, áleýmettik kepildik júıesin odan ári jetildirýge jaǵdaı týǵyzdy. Táýelsizdik jyldary Elbasy basshylyǵymen 2 myńǵa jýyq jańa mektep salyndy, sońǵy bes jyl ishinde ǵana partııanyń 2016-2020 jyldarǵa arnalǵan saılaýaldy baǵdarlamasyn iske asyrý aıasynda 3 myńnan astam balabaqsha ashylyp, bul mektep jasyna deıingi balalardy qamtý kólemin 86%-dan 98,5%-ǵa deıin ulǵaıtýǵa múmkindik berdi.
Memleket basshysy Qasym-Jomart Toqaevtyń bastamasymen tórt jyl kóleminde pedagogterdiń jalaqysy 2 ese kóbeıetin boldy. Bunyń barlyǵy – Elbasy men Prezıdent saıasaty sabaqtastyǵynyń nátıjesi, ustaz mártebesin kóterý úshin jasalyp jatqan sharalardyń naqty kórsetkishi.
Pandemııa kezinde mektepterdiń bári qashyqtan oqytýǵa kóshkende balany tárbıeleý men oǵan bilim berýde muǵalimniń mańyzy qanshalyqty zor ekenine barshanyń kózi jetti. Osyǵan baılanysty týyndaǵan keıbir qıyndyqtarǵa qaramastan, ustazdarymyz óz isine jaýapkershilikpen qarap, zaman talabyna saı mindetterin abyroımen atqarýda. Sondyqtan da biz shákirtteriniń sanasyna bilim nárin quıyp júrgen ustazdarymyzdy árdaıym maqtan tutamyz.
Barshańyzǵa zor densaýlyq, baq-bereke, shyǵarmashylyq tabys tileımin!", dedi Baýyrjan Baıbek.
