“Balyq sharýashylyǵyndaǵy negizgi problemanyń biri – kadr tapshylyǵy. Osy saladaǵy bilgenimizben bólisý maqsatynda balyq mektebin ashtyq. Sondyqtan qazir Qazaq ulttyq ýnıversıtetimen birlesip, oqý orny bazasynda ǵylymı-óndiristik ortalyq ashyp, stýdentterge teorııalyq bilim berip jatyrmyz. Sodan keıin bizde tájirıbeden ótedi de, jumysqa ornalasady. Qalasa ózi sharýashylyq ashady”, - dep túsindirdi sharýashylyq dırektory.
Bıyldyń ózinde sharýashylyq mamandary 30 adamdy oqytqan. Sonyń 10-y jumys isteýge qalǵan.
“Balyqty qalaı tamaqtandyrý kerek, qandaı otyrǵyzý materıaldary qajet, bárin kórsetemiz. Balyqty aýrýlardan saqtaýǵa baǵyttalǵan vaksınasııanyń jasalý jolyn da kórsetemiz. Al sharýashylyqtyń ózindegi tolyq bazalyq kýrsty 10 kúnde ótýge bolady”, - deıdi M.Tursynáli.
Máselen, Qazaq ulttyq ýnıversıtetiniń 4-kýrsynyń stýdenti Jansulý Úrgenishbaeva balyq mektebin bitirip, ıhtıapotolog bolyp jumysqa turyp úlgergen.
“Biz balyqtyń aýrýǵa shaldyqpaýyna jaýap beremiz. Teorııa men praktıkany ushtastyryp, jumys istep jatyrmyz. Oqyǵan bir basqa, kózben kórip, qolmen ustaǵan bir basqa. Sondyqtan osy ádis óte tıimdi. Balyqtardyń aýrý túrleri óte kóp. Ár aı saıyn dezınfeksııa jasaımyz. Sýdy tazalaımyz. Balyqty arnaıy basseınderge shomyldyramyz”,- deıdi jas maman.
Qazir Esik balyq sharýashylyǵynda balyqtyń 6 túri ósiriledi. Olar - hanbalyq, sazan, amýr, dóńmańdaı, bekire, klarıýs somy. 250 tonna forel, 50 tonna bekire óndiriledi. Negizgi tutynýshy – Almaty qalasy men oblys halqy.
Eske salsaq, Memleket basshysy Qasym-Jomart Toqaev halyqqa joldaýynda balyq sharýashylyǵyna erekshe mán berý kerektigin aıtqan. 2019 jyly elimizdiń balyq jáne balyq ónimderi naryǵynyń jalpy kólemi 66 myń tonnany qurady. Qazaqstandaǵy sý resýrstary 600 myń tonnaǵa deıin balyq ósirip, eksportty 10 esege arttyrýǵa múmkindik beredi. Sol sebepti qazir Ekologııa mınıstrligi sharýalardy qoldaý maqsatynda birqatar Zańdarǵa ózgeris engizip, sýbsıdııa berý joldaryn qarastyryp jatyr.
