Baspasóz týryna qatysqan BAQ ókilderi qaladaǵy saıabaqtar men gúlzarlardy aralap, «Jumyspen qamtýdyń jol kartasy – 2020» baǵdarlamasy men «Bıýdjetke qatysý» jobasy aıasynda jasalyp jatqan jumystarmen tanysty. Búginde qaladaǵy saıabaqtar men gúlzarlar eresekter men balalardyń paıdaly ýaqyt ótkizý ornyna aınalýy úshin qala turǵyndarynyń pikirleri eskerilip, jumystar júrgizilýde.
Eń aldymen qalanyń Bostandyq aýdanyndaǵy Tımırıazev-Shashkın kósheleriniń qıylysynda ornalasqan «Dostyq» saıabaǵyna bardyq. Munda «Jumyspen qamtýdyń jol kartasy-2020» memlekettik baǵdarlamasy aıasynda abattandyrý, kógaldandyrý jumystary júrgizilýde.
– Saıabaqty abattandyrý jumystary aıaqtalýǵa jaqyn. Endigi kezekte «workout» sport alańy, balalar oıyn alańy, ıtpen serýendeıtin arnaıy jer, jaryqtandyrý jumystary, jolǵa asfalt, tekshetas tóseý jumystary qaldy. Barlyq jumys qarasha aıynyń sońynda aıaqtalady dep kútilýde. Al abattandyrý jumystary jergilikti turǵyndarmen aqyldasa otyryp júrgizilýde. Sondaı-aq 370 túp aǵash otyrǵyzylatyn bolady, – dedi «Dostar» qurylys kompanııasynyń ókili Azat Estaev.
Osydan soń Almaly aýdanynda ornalasqan «Gandı» saıabaǵynyń batysyndaǵy gúlbaq pen «Mahabbat» gúlzaryna jol tarttyq. Almaly aýdanynyń kóriktendirý bóliminiń basshysy Tólegen Ákimhan «Gandı» saıabaǵynyń batysyndaǵy gúlbaqty abattandyrý jumystary «Bıýdjetke qatysý» jobasy aıasynda turǵyndardyń usynysymen júzege asyp jatqanyn jetkizdi.
– Qazirgi tańda rezeńke men tekshetastan tósem tóselip, aýmaqty asfalttaý jumystary, oryndyqtar men qoqys jáshikterin ornatý, qalpyna keltirý jumystary júrgizilgen. Sondaı-aq saıabaqta «workout» sport alańy, trenajerler, eki sport aımaǵy, balalar alańy ornatyldy. Jaryqtandyrylǵan saıabaqqa san túrli sáýle shashatyn tireýler men shamdar, 24 shyraq, sándi sáýle úlgisindegi 8 shyraq ornatyldy. Budan bólek 100 túp aǵash otyrǵyzyldy. «Mahabbat» gúlzarynda da kógaldandyrý jumystary júrgizilip, aǵashtar men kópjyldyq butalar, kógaldar otyrǵyzyldy. Jaryqtandyrý qamtamasyz etildi.
Kelesi kezekte Medeý aýdanyndaǵy «28 panfılovshy gvardııashylar» saıabaǵyna baryp, saıabaq aýmaǵyn abattandyrý jobasymen tanystyq. Joba «Jumyspen qamtýdyń jol kartasy-2020» memlekettik baǵdarlamasy aıasynda júzege asýda. Saıabaq aýmaǵyn abattandyrý kezinde aýdany 17 myń sharshy metrden asatyn asfaltbeton jabynyn aýystyrý, 373 jaryqtandyrý tirekterin ornatý, aýdany 3 600 sharshy metrden asatyn trotýar plıtkalaryn ornatý, 59 myń sharshy metrden asatyn aýmaqty kógaldandyrý kózdelgen. 103 jańa oryndyq ornatylyp, 23 retro oryndyq qalpyna keltiriledi, sondaı-aq uzyndyǵy 2100 p.m. drenaj júıesin qaıta qurý boıynsha jumystar oryndalady, búginde jumys kóleminiń 75%-dan astamy aıaqtaldy. Shamamen aıaqtalý merzimi qazan aıynyń sońyna deıin eken.
«Negizinen saıabaq aýmaǵynda jaryqtandyrýdy aýystyrý jáne jalpy jaqsartý jumystary júrgiziledi. Jaıaý júrginshiler men trotýarlyq joldardy aýystyrý qarastyrylǵan. Shaǵyn sáýlet nysandary da aýystyrylady», dedi qalalyq jaıly orta bóliminiń basshysy Rýslan Kemelbaev. Onyń aıtýynsha, búgingi tańda saıabaq aýmaǵyndaǵy eski dýaldardy qalpyna keltirý boıynsha kompanııamen kelisimge qol qoıyldy. «Qalpyna keltirý kezinde bul jerde qorshaýlarda 20-dan astam boıaý qabaty, biriniń ústine biri jaǵylǵany anyqtaldy. Merdiger uıym arnaıy jabdyqtarǵa ıe kásibı bazasy bar kompanııany tapty, ol qalpyna keltirýdi júrgizedi», dep túsindirdi R.Kemelbaev.
Baspasóz týryna qatysýshylar osydan soń Túrksib aýdanynda ornalasqan «Jas qanat» shaǵyn aýdanyndaǵy saıabaq pen «Maıak» aýylyna rekreasııalyq aımaqtar qurý boıynsha jumystar júrgizilip jatqan «Áýejaı» kóliniń aımaǵyna bardy. Qalalyq «Jasyl ekonomıka» basqarmasynyń basshysy Natalıa Lıvınskaıanyń málimetinshe, kógaldandyrý alańy 170 myń sharshy metrdi quraıdy. Qaıta qurý kezeńinde 70 jumys orny quryldy. 22 976 sharshy metr alańǵa abattandyrý jáne kógaldandyrý júrgizildi. Avtokólikterge arnalǵan 30 oryndyq turaq aımaqtary jáne velosıpedterge arnalǵan turaq bar. Aýmaqta sporttyq nysandar, «workout» alańdary, shaǵyn fýtbol jáne strıtbol alańdary, parkýr alańdary, balalar alańdary salyndy. Sondaı-aq 125 oryndyq, 130 qoqys salǵysh, oryndyqtary bar 8 ústel ornatyldy.
Almaty qalasynyń óńirlik kommýnıkasııalar qyzmeti uıymdastyrǵan baspasóz týrynan keıin tikeleı efırde ótken brıfıngte Almaty qalasynyń Jasyl ekonomıka basqarmasynyń basshysy Natalıa Lıvınskaıa qalany kógaldandyrý boıynsha búginde naqty atqarylyp jatqan jumystar týraly baıandap, jýrnalısterdiń qoıǵan suraqtaryna jaýap berdi.
«Búginnen bastap biz kúzgi kóshet otyrǵyzýǵa kiristik. Jumys bıyl 20 qarashaǵa deıin sozylady. Shamamen 290 myń kóshet otyrǵyzý josparlanýda. Jasyl jelekterdiń basym bóligi Alataý, Naýryzbaı, Jetisý aýdandaryna otyrǵyzylady», dedi N. Lıvınskaıa.
Aıta ketý kerek, jasyl jelek otyrǵyzýǵa nıetti árbir qala turǵyny bul sharaǵa qatysa alady. Al jelek otyrǵyzý kestesi basqarmanyń resmı saıtynda jarııalanǵan.
Qazirgi tańda «Almaty-2050» damý strategııasyn atap aıtqanda, «Adamdarǵa arnalǵan qala» qaǵıdatyn iske asyrý sheńberinde megapolıste aıtarlyqtaı jumystar atqarylýda.
Dýman ARǴYNGELDI,
jýrnalıst
