Jıynda óńirdegi ekologııalyq máselelerdi sheshý boıynsha daıyndalyp jatqan Jol kartasynyń jobasy tanystyryldy. Mınıstrdiń aıtýynsha, qazir Qostanaı oblysynda ekologııa boıynsha birqatar problema bar. Jol kartasy sonyń bárin qamtýy tıis.
«Mundaı problemalardyń qataryna Qostanaıda bıologııalyq tazartý stansalarynyń joqtyǵyn, óńirdegi qalalarda kanalızasııalyq tazartý ǵımarattarynyń tıimsiz jumysyn, eldi mekenderdegi qatty turmystyq qaldyqtardy ornalastyrý máselesin jatqyzýǵa bolady. Osy jáne ózge de máseleler boıynsha keshendi sharalar qabyldaý kerek. Bul baǵytta ákimdiktiń atqaratyn jumysy mańyzdy. Jol kartasyna naqty sharalar engizildi, endi sony júzege asyrý qajet», dedi M.Myrzaǵalıev.
Aıta ketelik, atalǵan óńir boıynsha daıyndalǵan Jol kartasy kógaldandyrý, jer resýrstary, sý resýrstary, qaldyqtardy basqarý, atmosferalyq aýaǵa shyǵarylatyn qaldyqtardy azaıtý sekildi 7 bólimnen turady. Kezdesýge qatysqan qoǵamdyq uıymdar men óńirdegi iri óndiris oryndarynyń ókilderi endi Jol kartasy jobasymen tolyq tanysyp, eki apta ishinde óz usynystary men eskertýlerin berýi tıis.
«Bizdiń maqsatymyz ben mindetimiz ortaq ekenin túsiný kerek. Keri baılanys qajet. Tek sonda ǵana atalǵan qujat arqyly ózekti ekologııalyq problemalardy sheshe alamyz», dep atap ótti mınıstr.
Ekologııalyq ahýaldy jaqsartýǵa baǵyttalǵan Jol kartalaryn mınıstrlik basqa óńirler halqymen de talqylaýdy jalǵastyrady.
