Reseı Federasııasy Kostroma qalasyndaǵy radıasııalyq, hımııalyq jáne bıologııalyq qorǵaý áskerı akademııasynyń túlegi búginge deıin Aqmola, Almaty, Qaraǵandy, Atyraý oblystaryndaǵy garnızonda jumys istegen.
Byltyr Aqtóbege aýysyp kelgen Ahmet Momynov Qorǵanys mınıstrligi tarapynan barlyq jaǵdaıdyń jasalǵanyn, tek qyzmetin oıdaǵydaı atqarý basty mindeti ekeni jóninde áńgime tıegin aǵytty.
– Naǵashy atam men aǵam – áskerı adamdar. Ekeýi de Almatydaǵy áskerı akademııany támamdaǵan. Kishkentaıymnan solardyń jolyn qýýdy maqsat tuttym. Biraq kórshiles elde bilim alǵandy táýir kórdim. Kópshiligi nelikten dál osy mamandyqty tańdaǵanymdy surap jatady. Injener-ekologke kóptegen mekemede jumys tabylady, bunyń syry osynda jatsa kerek.
Osyndaǵy áskerı ınstıtýtta áriptesim bar, ekeýmiz sırek kezdesetin mamandyqtyń ıesimiz. Men Aqtóbedegi kadrlyq jaǵdaı boıynsha aıtyp otyrmyn. О́z basym jalaqyny eseptemegende, páteraqymen de qamtylamyn. Odan artyq ne kerek? Qyzmetime kóńilim tolady, – deıdi Aqtóbe garnızonynyń radıasııalyq, hımııalyq jáne bıologııalyq qorǵaý qyzmetiniń bastyǵy A.Momynov.
Onyń kúndelikti qyzmettik mindetine áskerılerdi hám olar ornalasqan aýmaqty túrli zııandy zattardan qorǵap, tazalyq jumystarynyń talapqa saı júrgizilýin qadaǵalaý kiredi. Apta saıyn jeke quramdarmen túrli tehnıkanyń jaı-kúıin tekserý, oqý-jattyǵý jumystaryn ótkizý de kásibı daǵdylarynyń biri. Arasynda jospardan tys sharýalar da bolyp jatady. Aıtalyq, naýryz aıynyń ortasynda elimizdi koronavırýs ınfeksııasy jaılaǵanda, áńgimelesýshimizdiń áskerılerdi dezınfeksııa jumystaryna jumyldyrýyna týra kelgen.
– Mamandyǵyma sáıkes dezınfektor da bola alamyn. Vırýsqa baılanysty qalada zararsyzdandyrý jumystaryn jasaýǵa buıryq aldyq. Kúnine 24 áskerı qyzmetker men kýrsanttar – barlyǵy júzden astam adam uzyndyǵy 3 shaqyrym jolǵa arnaıy suıyqtyq shashtyq. Olarǵa jetekshilik ettim. Atalǵan jumys 25 naýryzdan 10 sáýirge deıin sozyldy. Keıin bul áskerı jıyndarǵa shaqyrylǵandarǵa júkteldi.
Dezınfeksııa jasaý anaý aıtqandaı aýyr boldy dep aıta almaımyn. Tek basynda kún sýyqta uzaq ýaqyt dalada júrý qıynǵa soqty. Qasymdaǵy jigitter bar, olardyń densaýlyǵyna alańdaısyń. Degenmen, buıryqtyń aty – buıryq, oryndaýǵa mindettimiz. Ony oıdaǵydaı atqaryp shyqtyq dep oılaımyn, vırýstyń taralmaýyna az da bolsa úlesimizdi qostyq. Keıinnen blok-beketterde de osyndaı jumystar jalǵasyn tapty. Osy oraıda eńbegimiz eskerilip, basshylyq tarapynan syıaqy alǵanymyzdy aıta ketkim keledi, – dep aǵynan jarylady Ahmet.
Jumysyn mindetti túrde qorǵanys kıimimen, ózge de qajetti jabdyqtardyń kómegimen atqaratyn ınjener-ekolog qaýipsizdik erejelerin saqtaýǵa basa mán berilý kerektigine erekshe toqtaldy. Jáne mundaı sharalar ol úshin tańsyq emes. A.Momynov – Reseıde uıymdastyrylǵan oqý-jattyǵý jumystaryna tartylǵan qazaqstandyq áskerı mamandardyń biri. Iаǵnı onyń Aqtóbedegi osynaý jumystarǵa tańdalyp alynýy kezdeısoqtyq emes.
Ahmettiń oıynsha mamandyǵyn jan-tánimen súıgen adam kez kelgen qıyndyqty eńsere alady. Ol kózi ashyq adamdar áskerılerdiń qyzmetiniń qıyn ekenin burynnan-aq biletinin qosty.
– Áskerı qyzmetkerler – buıryqty oryndaýshylar ǵana, ıaǵnı polıseılerdegi sııaqty olarda belgili bir quzyret joq. Buny qarapaıym halyq ta biledi. Mysaly, tótenshe jaǵdaı kezinde bizge zararsyzdandyrý jumystaryna qatysyńdar dedi, biz sony atqardyq. Ásirese, úlkender jaǵy buny jaqsy túsinip, kórgen saıyn jyly sózin aıamaıdy. Eńbegimizdi baǵalaıdy. Kóshedegi tártipti de qadaǵalaıtyn bizdiń jigitter – áskerı bólimdegi sarbazdar. Olarda eshqandaı qarý joq, buzaqylyqty baıqasa, aldymen saqshylardy shaqyrady. Maqtaǵanym emes, shynymen solaı. Osy turǵydan kelgende, dál osy salada eńbek etkenime eshqashan ókingenim joq. Buqara men bılik te bizdi qadirleıdi, – deıdi.
Maıor, árıne, barlyq qyzmettesteri syndy general bolýdy armandaıdy. Oǵan deıin áskerı bilimin jetildirý – alǵa qoıǵan maqsaty. Ol úshin arnaıy irikteýden ótip, birneshe talapty joǵary deńgeıde oryndaý qajet. «Akademııada taǵy eki jyl oqysam, áskerı shenim ósedi. Laýazymym da soǵan saı ózgeredi. Sondyqtan bıyl jaz aılarynda baǵym men babymdy synap kórmekpin. Bizdiń jumysymyz onsyz da árdaıym daıarlyqty, kez kelgen isti tosyrqamaı oryndaýdy talap etedi ǵoı. Kún saıyn ózindik emtıhan tapsyrǵandaı bolamyz. Aldaǵy syn qıyn bola qoımas», dep syr bólisedi 35 jastaǵy Qarýly Kúshter salasynyń ókili.
Aıbek TASQALIEV,
jýrnalıst
Aqtóbe
