"Kótermese kóńildi kir basady" deıdi qazaqtyń qara óleńinde. Kóńil kóterý degen – oısyz, qamsyz kúlki emes, úreıden, aýrý qaı jaqtan keledi degen ýaıym men qorqynyshtan bir sátke bolsa da basty alyp qashyp, arylý. Qazaqstannyń basqa qalalarynda ázirge mundaı múmkindik týǵan joq, tek Almatydaǵy bizdiń qarashańyraq teatrymyzda ǵana kórermenniń elý paıyzyn shaqyryp, spektakl kórsetýge ruqsat berildi. Sizdermen qaıta qaýyshý múmkindiginiń týyp otyrǵanyna biz de qýanyshtymyz", dedi teatr dırektory Erkin Jýasbek.
Jańa maýsymnyń basty jańalyǵy, karantın merziminen keıin kórermenge usynylyp otyrǵan alǵashqy spektakldiń "Abaıdyń jumbaǵym dep atalýynyń ózindik syry bar. "Abaı joly" romanynyń jelisimen, Abaıdyń óz qarasózderi men óleńderi boıynsha jazylǵan kompozısııalyq qoıylymnyń sahnalyq nusqasyn jasaǵan Qazaqstannyń eńbek sińirgen qaıratkeri Bolat Ábdilmanov pen belgili jazýshy-dramatýrg Madına Omarova. Qoıýshy rejısseri – Arıdash Ospanbaeva. Qoıýshy sýretshi – Murat Saparov.
Abaı rólinde "Qurmet" ordeniniń, "Qulager" syılyǵynyń ıegeri akter Bolat Ábdilmanov.
Spektaklde Abaıdy bala kezinen, Zere men Uljan tárizdi qos anasyna erkelep júrgen sátinen bastap, azamattyq kózqarasy aıqyndalyp, ult aqyl-oıy, rýhanııat kósemi deńgeıine kóterilgenge deıingi tutas kezeńder kórermen kóz aldynda tizbektele jóneledi. Oqıǵa jelisi Abaıdyń óz óleńderimen órile otyryp, fılosofııalyq mazmunynyń zamanaýı ssenografııalyq tyń tásildermen baıytyla túskeni – spektakldiń utymdy tusy. Abaı ómirindegi negizgi, erekshe oqıǵalardy jeke kórinister túrinde alyp, ekspress sholý tárizdi kórermen nazaryna jalt etkizip usyný kózdelgen.
Abaı – tutas bir álem, áli tolyq ıgerilip bolmaǵan ǵarysh. Abaı jumbaǵyn sheshýge umtylý – onyń ómirlik-ónerlik baıanyn zerdelep baıqaýǵa degen umtylys. Uly aqynnyń óziniń áleýmettik ortasynan erekshelenýiniń, adam atty uly qubylysty zertteý-taný jolynda "tolyq adam" ilimin ashýynyń, osylaısha Hakimdik deńgeıge jetýiniń jumbaǵy nede? Bul kúrdeli saýaldarǵa Abaıdyń óz shyǵarmashylyǵyna jáne M.Áýezovtiń ataqty "Abaı joly" epopeıasynyń oqıǵalaryna súıene otyryp, óz tarapynan jaýap izdeıtin qoıylym kórermenin de osy bir kúrdeli saýal tóńireginde oıseriktestikke shaqyrady.
"Abaıdyń jumbaǵy" – kópshilik sahnamen molynan qamtylǵan, án-bımen tolyqtyrylǵan keń tynysty, aýqymdy qoıylym. Jas Abaıdyń rólinde N.Qýanyshbaıuly kórinse, Qunanbaıdyń obrazynda belgili akter S.Merekeuly, Zere men Uljan beınesinde G.Tutova men Sh.Asqarova, Toǵjan rólinde D.Úsenova oınaıdy, jas akter J.Qonysbaı Ábdirahmannyń, al Ospannyń kelbetin E.Turysov keıipteıdi.
