Densaýlyq saqtaý mınıstrligi baspasóz qyzmetiniń habarlaýynsha, zerthanalar sanıtarııalyq-epıdemııalyq qyzmetti kúsheıtý jáne ınfeksııalyq aýrýlarǵa, COVID-19 indetine jedel kóńil bólý, indetti der kezinde emdeý sharalaryna daıyndyq aıasynda Densaýlyq saqtaý mınıstrliginiń qarajaty esebinen satyp alyndy.
PTR zerthanalar ekinshi deńgeıli bıologııalyq qorǵanys bokstarymen, avtonomdy energııa, shyǵyn materıaldarynyń qajetti jıyntyǵymen jabdyqtalǵan. Jyljymaly zerthanalar dalada asa qaýipti ınfeksııalarǵa zerthanalyq zertteýlerdiń tolyq spektrin oryndaýǵa, derbes jáne ınfeksııalyq aýrý oshaǵynda medısınalyq mekeme janyndaǵy issaparǵa jiberilgen stasıonarlyq zerthana retinde jumys isteı alady.
Aıta ketý kerek, bul zerthanalar tolyǵymen Qazaqstanda qurastyrylǵan. Shassı Kókshetaý qalasyndaǵy «Kamaz-Injınırıng» kompanııasynda, fýrgon, zerthanalyq jáne qosalqy jabdyqtardy Almaty qalasyndaǵy «Topol» kompanııasy jasaǵan.
Buǵan deıin Ulttyq ortalyqtyń Jambyl, Aqtaý, Atyraý óńirlik fılıaldaryna osyǵan uqsas úsh zerthana jiberilgen bolatyn. Bireýi Qazaqstannyń kez kelgen núktesinde sanıtarlyq-epıdemııalyq sıpattaǵy tótenshe jaǵdaı kezinde medısınalyq mekemeler jyldam jaýap berýi úshin rezerv retinde ornalastyrylǵan.
«Koronavırýs ınfeksııasynyń ekinshi tolqynyna daıyndyq jónindegi keńeste Memleket basshysy testileý qýatyn arttyrýdy tapsyrdy. Qazirgi ýaqytta elimizde zerthanalyq testileýdiń qýaty táýligine 48 myń testke deıin jetkizildi. Aımaqtarǵa jabdyqtar jetkizý jáne osyndaı jyljymaly zerthanalar satyp alý esebinen biz testileý qýatyn táýligine 63 myń zertteýge deıin arttyra alamyz», dedi Densaýlyq saqtaý mınıstri.
Sonymen qatar A.Soı AQIUǴO mamandarymen kezdesti, onda Qazaqstan Respýblıkasynyń bıoqaýipsizdik jáne halyqty bıoqorǵaý saıasatyn damytý máseleleri talqylandy. COVID-19 órshýi múmkin degen aqparat túsken kúnnen bastap AQIUǴO profılaktıkalyq jáne epıdemııaǵa qarsy is-shara ázirleýge kiristi. 2020 jyldyń aqpan aıynda AQIUǴO bazasynda PTR test-júıesi ázirlendi. Qazirgi ýaqytta medısınalyq buıymdardyń memlekettik tiziliminde tirkelgen. Ortalyq jylyna 200 myń zertteýge arnalǵan test júıesin shyǵara alady.
Qazaq ulttyq agrarlyq ýnıversıtetimen yntymaqtastyqta COVID-19-ǵa qarsy nano-emýlsııalyq adıývant negizinde nano-vaksına men sýbbirlikti vaksınany ázirleý boıynsha zertteýler júrgizilýde.
Jalpy, sapar qorytyndysy boıynsha mınıstr ımmýnobıologııalyq preparattardyń óndiristik bazasyn keńeıtý úshin usynystar engizýdi tapsyrdy, sondaı-aq halyqaralyq trenıng ortalyǵynda asa qaýipti ınfeksııalar boıynsha qysqa merzimdi oqytý kýrstaryn ashý qajettigin atap ótti.
