Aldaǵy ýaqytta áriptestik kelisim aıasynda dárister, sheberlik sabaqtary, dóńgelek ústelder, semınarlar jáne basqa da is-sharalar ótkiziledi dep josparlanýda. «Jastar» ǴZO dırektory Aıan Sakoshevtiń aıtýynsha, yntymaqtastyqtyń basty maqsaty – jastardy qoldaı otyryp, qoǵamdyq sanany jańǵyrtý.
«Rýhanı jańǵyrý» baǵdarlamasyn júzege asyrý maqsatynda Qazaqstandyq qoǵamdyq damý ınstıtýty men ENACTUS qorynyń qyzmeti bir-birine óte uqsas ári maqsaty bir. Sondyqtan bul memorandým qos tarapqa da óte tıimdi bolady dep oılaımyn. Shynyn aıtqanda, stýdent ýnıversıtetti bitirip, eńbek naryǵyna kirgen kezde ómirdiń barlyq jaǵdaıyna daıyn bolýy kerek. Osyǵan baılanysty búginde jastardyń basym bóligi bıznespen aınalysqysy keletinin kórip otyrmyz. Bul memlekettik ınstıtýttarǵa da tıimdi. О́ıtkeni jańa jumys oryndary ashylyp, el ekonomıkasynyń deńgeıi kóterilmek. Saıyp kelgende, bizge osyndaı jas kásipkerlerge birlesip kómektesý mańyzdy», deıdi A.Sakoshev.
Aıta keteıik, ENACTUS – álemniń 37 elinde kóshbasshylyq pen kásipkerlikke tájirıbe arqyly úıretetin iri platforma. Jyl saıyn ulttyq baıqaýlar uıymdastyryp, sonyń aıasynda JOO jáne mektepterdiń bıznes-komandalary 100-den astam jobalardy usynyp otyrady. Jobalar áleýmettik, ekologııalyq, ınnovasııalyq jáne kommersııalyq baǵyttarǵa arnalǵan. Qordyń mıssııasy – ınnovasııany túsine alatyn, kez kelgen qıyndyqtan jańa múmkindikterdi kóretin jáne ómirdi jaqsartý úshin bıznes prınsıpterin paıdalana alatyn kóshbasshy-kásipkerlerdiń jańa býynyn daıarlaý jáne tárbıeleý. ENACTUS qorynyń prezıdenti Albına Erjanovanyń aıtýynsha, Memorandým jastardy tıimdi tárbıeleýde jańa serpin berýi tıis.
– Menińshe, qoǵamdyq sanany adamı kapıtaldy sapaly daıyndaý men damytý arqyly jańǵyrtýǵa bolady. ENACTUS aıasynda biz álemdik básekelestik ortada jastardyń kóshbasshylyq qabiletterin shyńdaýmen jáne damytýmen aınalysamyz. Osy oraıda, bıznes salasyndaǵy úzdik tálimgerler jastarǵa áleýmettik mańyzy bar jobalardy iske asyrýǵa kómektesetin bolady, – deıdi A.Erjanova.
