Bul - otandyq jáne túrik mamandarynyń birlesken jobasy. IT-kompanııa dırektory Erlan Jánibekovtiń aıtýynsha, bul jobany olar jeke qarajatyna júzege asyrǵan. Jasandy ıntellekti jumysynyń kómegimen koronavırýstyq pnevmonııany jańa bastalǵan kezinen anyqtaýǵa múmkindik týdy. Bul emdeýdi jeńildetip, tolyq saýyǵyp shyǵatyn adam sanyn arttyrýǵa kómek etedi.
Jalpy koronavırýstyń bolýy múmkin ekinshi tolqynyna daıyndyq sheńberinde óńirde medısınalyq mekemelerdi qural-jabdyqtarmen qamtamasyz etý jumysy belsendi júrgizilýde. Qazirgi kezde 9 medısınalyq mekemede, ıaǵnı Panfılov, Alakól, Kegen, Qarasaı, Jambyl, Talǵar, Ile, Eńbekshiqazaq aýdandarynda jáne Taldyqorǵandaǵy oblystyq aýrýhanada kıslorod stansasy ornatylyp, jumys istep tur. Taıaý kúnderi Sarqan aýdanynda osyndaı stansa ornatý isi aıaqtalady. Sóıtip, kıslorod stansasymen qamtylǵan aýrýhanalar sany óńirde 13-ke jetedi.
Sol sııaqty oblysqa 180 jedel járdem mashınasy, 12 jyljymaly medısınalyq keshen, 3 sıfrly jáne 15 jyljymaly rentgen apparattary, sondaı-aq 3 kompıýterlik tomografııa, 150 IVL apparattary jáne basqa da qajetti jabdyqtar satyp alyndy.
Atap ótsek, oblysta táýligine 4,9 myń zertteý jasaı alatyn 8 zerthana bar desek, onda búginge deıin barlyǵy 213 myń PTR zertteý júrgizilgen.
